ట్రాక్టర్, లారీ ఢీకొని వ్యక్తి మృతి

దిశ,తల్లాడ : ట్రాక్టర్, లారీ ఢీకొని వ్యక్తి మృతి చెందగా ఇద్దరికి గాయాలైన సంఘటన గురువారం తల్లాడ ఎన్టీఆర్ కాలనీ సమీపంలో జరిగింది. పోలీసులు, స్థానికులు తెలిపిన వివరాల ప్రకారం తల్లాడ మండలం బిల్లుపాడు గ్రామానికి చెందిన వ్యవసాయ కూలీలు ట్రాక్టర్ ద్వారా వరిగడ్డి లోడ్ చేసుకొని పొలాల్లో నుండి తల్లాడ ఎన్టీఆర్ కాలనీ సమీపంలోని ప్రధాన రహదారిపైకి వస్తుండగా తల్లాడ వైపు నుండి సత్తుపల్లి వెళుతున్న లారీ ఢీ కొట్టింది.

    ఈ ప్రమాదంలో వ్యవసాయ కూలీలు షేక్ మీరాకు తీవ్ర గాయాలు కాగా చీమకుర్తి వెంకన్న, కాలింగి సతీష్ కు స్వల్ప గాయాలయ్యాయి. స్థానికుల సహాయంతో ముగ్గురిని 108 వాహనంలో ఖమ్మం గవర్నమెంట్ హాస్పిటల్ కు తరలించారు. పరిస్థితి విషమించి షేక్ మీరా (38) మృతి చెందాడు. ఈ మేరకు కేసు దర్యాప్తు చేస్తున్నట్లు పోలీసులు తెలిపారు.