స్క్రాప్ గోదాంలో అగ్ని ప్రమాదం...

దిశ, కార్వాన్ : స్క్రాప్ గోదాంలో మంటలు అంటుకొని కాలి బూడిదైన సంఘటన గుడిమల్కాపూర్ పోలీస్ స్టేషన్ పరిధిలో జరిగింది. రింగ్ రోడ్డు మొగల్ కా నాలా వద్ద మహబూబ్ ప్రైడ్ ఫంక్షన్ హాల్ పక్కన ఉన్న ప్లాస్టిక్ స్క్రాప్ గోదాంలో బుధవారం అర్థరాత్రి సమయంలో అగ్నిప్రమాదం జరిగింది. భారీగా మంటలు చెలరేగడంతో స్థానికులు భయాందోళనలతో పరుగులు తీశారు. సమాచారం అందుకున్న గుడిమల్కాపూర్ పోలీసులతో పాటు లంగర్ హౌస్ ఫైర్ సిబ్బంది రెండు ఫైర్ ఇంజన్లతో సంఘటనా స్థలానికి చేరుకొని మంటలను ఆర్పారు.

ప్రమాదానికి గల కారణాలు తెలియాల్సి ఉంది. ప్లాస్టిక్ స్క్రాప్ దుకాణంలో ఎంత మేరకు నష్టం జరిగిందని పోలీసులు నిర్ధారణ చేయలేకపోయారు. ప్లాస్టిక్ స్క్రాప్ గోదాం పక్కన, ఎదురుగా పలు ఫంక్షన్ హాల్ లలో వివాహాలు జరగడంతో ఆ ప్రాంతంలో ఉన్న జనాలు పరుగులు తీశారు. అంతేకాకుండా ఈ ప్రమాదంతో సుమారు కిలోమీటర్ మేరకు ట్రాఫిక్ జామ్ అయింది. దీంతో స్థానిక పోలీసులు వచ్చి అర్థరాత్రి వరకు ట్రాఫిక్ ను క్రమబద్ధీకరించారు. పోలీసులు కేసు నమోదు చేసి దర్యాప్తు చేస్తున్నారు.