ట్రాక్టర్ ఢీకొని సైకిలిస్టు దుర్మరణం..

దిశ, భిక్కనూరు : ట్రాక్టర్ ఢీ కొనడంతో సైకిలిస్టు దుర్మరణం పాలైన సంఘటన భిక్కనూరు మండల కేంద్రంలో గురువారం చోటు చేసుకుంది. వివరాల్లోకి వెళితే పట్టణానికి చెందిన నీల ఇస్తారి (55) సైకిల్ పై సినిమా టాకీస్ మీదుగా గాంధీ చౌక్ వైపు వెళ్తున్నాడు. అదే సమయంలో ఇసుక లోడుతో వెళ్తున్న ట్రాక్టర్ ఢీ కొనడంతో ఈ ప్రమాదం జరిగింది. ఈ ప్రమాదంలో ఇస్తారి అక్కడికక్కడే దుర్మరణం పాలయ్యాడు. ఈ విషయం తెలుసుకున్న కుటుంబ సభ్యులు ఘటనా స్థలానికి చేరుకొని, ప్రమాదానికి కారణమైన డ్రైవర్ ను ఆగ్రహంతో బాధిత కుటుంబ సభ్యులు కొందరు దాడికి దిగారు.

ఈ విషయం పోలీసులకు సమాచారం అందడంతో వెంటనే ఎస్సై సాయికుమార్ తన సిబ్బందితో ఘటనా స్థలానికి చేరుకొని, ప్రమాదానికి కారణమైన డ్రైవర్ ను అదుపులోకి తీసుకున్నారు. మృతునికి భార్య సత్తెవ్వ, ఇద్దరు కుమారులు శ్రీనివాస్, స్వామి, ఇద్దరు కుమార్తెలు ఉన్నారు. మొన్నటి వరకు ట్రాన్స్ కో డిపార్ట్మెంట్ లో కాంట్రాక్టర్ లేబర్ గా పని చేసిన ఆయన ప్రమాదంలో మృతి చెందడం తెలియగానే, పెద్దఎత్తున వారి కుటుంబ సభ్యులు బంధువులు ఘటనా స్థలానికి చేరుకొని బోరున విలపించారు. ఈ మేరకు కేసు నమోదు చేసుకున్న పోలీసులు మృతదేహాన్ని పోస్టుమార్టం నిమిత్తం కామారెడ్డి జిల్లా కేంద్ర ఆసుపత్రికి తరలించారు.