మహిళపై మూత్రం పోసిన యువకుడు

దిశ, వెబ్‌డెస్క్: మనుషుల ప్రవర్తన రోజురోజుకీ ఆందోళనకరంగా మారుతోంది. చదువుకున్న కొంతమంది యువకులు సైతం చిత్రంగా ప్రవర్తిస్తున్నారు. ఇటీవల విమానంలో ప్రయాణికురాలిపై ఓ వ్యక్తి మూత్రం చేసిన ఘటన మరవకముందే కర్ణాటకలో ఆర్టీసీ బస్సులో ఇలాంటి ఘటనే చోటు చేసుకుంది.బస్సులో నిద్రిస్తున్న ప్యాసింజర్‌పై ఓ యువకుడు టాయిలెట్ పోయడం కలకలం రేపింది. విజయపుర నుంచి మంగళూరుకు వెళ్తున్న కర్ణాటక ఆర్టీసీ బస్సు హుబ్బళ్లి సమీపంలోని కిరేసూరులో ఒక దాబా వద్ద ఆగింది.

ప్రయాణికులు టీ తాగేందుకు, వాష్ రూం వెళ్లేందుకు దిగారు. కాగా బస్సులో ముందు వరుసలో కూర్చున్న మహిళపై రామప్ప అనే 25 ఏళ్ల యువకుడు మూత్రం పోశాడు. దీంతో నిద్రలో ఉన్న సదరు మహిళ మేలుకుని గట్టిగా కేకలు పెట్టారు. అరుపులతో ప్రయాణికులు, బస్సు డ్రైవర్, కండక్టర్ పరుగున బస్సు వద్దకు చేరుకున్నారు.

బాధితురాలు జరిగిన విషయాన్ని తెలియజేయడంతో నిందితుడిని తిట్టి, లగేజీతో సహా ఆయనను బస్సు నుంచి దించేశారు. కొంత మంది రామప్పను కొట్టారు. కాగా నిందితుడిని మెకానికల్ ఇంజనీరింగ్ చదివిన వాడిగా గుర్తించారు. మహిళ విజ్ఞప్తి మేరకు ఈ ఘటనపై పోలీసులకు ఫిర్యాదు చేయలేదని కండక్టర్ తెలిపారు.