థాంక్యూ పవర్ స్టార్ : చిన్మయి

దిశ, వెబ్‌డెస్క్: బాలీవుడ్ మూవీ ‘పింక్’ రీమేక్‌గా తమిళ్‌లో వచ్చిన ‘నేర్కొండ పార్వై’ సినిమాపై ప్రశంసలు కురిపించింది సింగర్ చిన్మయి శ్రీపాద. సగటు సినిమా ప్రేక్షకుడిగా కేవలం హ్యాపీ ఫిల్మ్స్ మాత్రమే చూసేందుకు ఇష్టపడే తను.. ‘నేర్కండ పార్వై’ చూసేందుకు ఇన్నాళ్లు భయపడ్డాననని, ధైర్యం తెచ్చుకుని ఆదివారం సినిమా చూశానని తెలిపింది. సినిమా చూశాక.. అంత సెన్సిటివ్ మ్యానర్‌లో మెసేజ్ కన్వే చేయడం చాలా సంతోషంగా అనిపించిందన్నారు. సూక్ష్మ, ప్రగతిశీల భావంతో కూడిన సినిమా కోసం అజిత్ లాంటి గొప్ప స్టార్ పని చేయడం పట్ల హృదయపూర్వక కృతజ్ఞతలు తెలిపింది చిన్మయి. ఇలాంటి మెసేజ్‌ను స్ప్రెడ్ చేయడంలో చాలా హెల్ప్ అయ్యారని, ఈ సినిమా.. చూసిన ప్రతీ ఒక్కరిని ఆలోచించేలా, ప్రశ్నించుకునేలా, అర్థం చేసుకునేలా చేస్తుందని చెప్పింది. పవర్‌స్టార్ పవన్ కళ్యాణ్ తెలుగులో ఈ (వకీల్ సాబ్) మూవీ చేస్తుండటం మరింత సంతోషాన్నిస్తోందని తెలిపింది చిన్మయి.

‘నేర్కొండ పార్వై, డియర్ కామ్రేడ్, బ్రోచేవారెవరురా’ లాంటి సినిమాల రచయితలు, దర్శకులను చూస్తుంటే గర్వంగా ఉందన్న చిన్మయి.. మహిళల పట్ల జరుగుతున్న సంఘటనలను అర్ధం చేసుకుని సెన్సిటివ్‌గా తెరకెక్కించినందుకు ధన్యవాదాలు తెలిపింది. ఇలాంటి చిత్రాలు సమాజంలో మార్పును తీసుకొస్తాయని అభిప్రాయపడింది.