iPhone: ఛార్జింగ్ పోర్ట్ లేకుండా ఐఫోన్
భవిష్యత్తులోనూ ఐఫోన్‌లు పూర్తిగా పోర్ట్-రహితంగా ఉండేలా కంపెనీ ప్రణాళికలు సిద్ధం చేస్తున్నట్టు సమాచారం.
దిశ, బిజినెస్ బ్యూరో: గ్లోబల్ టెక్ దిగ్గజం యాపిల్ సాధరాణంగా సరికొత్త ఫీచర్లను ఇతర స్మార్ట్‌ఫోన్ కంపెనీల కంటే ముందుగా తన ఇఫోన్‌లలో తీసుకొస్తుంది. అదే తరహాలో ఈ ఏడాది రాబోయే ఐఫోన్ 17 ఎయిర్‌ను ఆల్ట్రా స్లిమ్ డిజైన్‌లో విడుదల చేయనున్నట్టు ఇప్పటికే రూమర్లు వచ్చాయి. అంతేకాకుండా ఈ ఫోన్ డిజైన్‌లో యాపిల్ కంపెనీ భారీ మార్పులు చేయనున్నట్టు తాజాగా బ్లూమ్‌బర్గ్ నివేదిక పేర్కొంది. ప్రధానంగా ఈ మోడల్ స్లిమ్ డిజైన్ కోసం కొన్ని కీలక అప్‌గ్రేడ్లు చేస్తున్నట్టు ఊహాగానాలు వినిపిస్తున్నాయి. అందులో భాగంగా ఛార్జింగ్ పోర్ట్ లేకుండా ఐఫోన్‌ను తయారు చేయాలని యాపిల్ భావిస్తోంది. తద్వారా భవిష్యత్తులోనూ ఐఫోన్‌లు పూర్తిగా పోర్ట్-రహితంగా ఉండేలా కంపెనీ ప్రణాళికలు సిద్ధం చేస్తున్నట్టు సమాచారం. ప్రస్తుతానికి యాపిల్ దీనిపై తుది నిర్ణయం తీసుకోనప్పటికీ, ఐఫోన్ 17 ఎయిర్‌లోనే ఈ పోర్ట్-ఫ్రీ సదుపాయం తీసుకురావాలని ఆశిస్తోంది. ఐఫోన్ 17 ఎయిర్ విజయవంతమైతే, భవిష్యత్తులో ఇది పూర్తిగా పోర్ట్-రహిత మోడల్‌లకు మార్గం సుగమం చేస్తుందని యాపిల్ అధికారులు భావిస్తున్నారు. పోర్ట్‌లెస్ ఐఫోన్ గురించి యాపిల్ కొన్నేళ్ల నుంచే చర్చలు జరుపుతోంది. గతంలో భౌతిక సిమ్ ట్రే, డ్యూయెల్ కెమెరా లేకుండా తీసుకురావాలనే చర్చ జరిగింది. యాపిల్ సప్లై చెయిన్‌కు చెందిన మింగ్-చి కువొ.. యాపిల్ సంస్థ 2021లోనే ఛార్జింగ్ పోర్ట్ లేని మొదటి ఐఫోన్ తీసుకురావాలని భావించింది. అయితే, టెక్నాలజీ, నియంత్రణా పరమైన సమస్యల కారణంగా దాన్ని విరమించుకుంది.