హుజురాబాద్ బీజేపీదే.. బండి సంజయ్ జోస్యం

దిశ, హుజురాబాద్: హుజురాబాద్ శాసనసభకు జరిగిన ఉపఎన్నికల్లో బీజేపీ అభ్యర్థి ఈటల రాజేందర్ భారీ మెజార్టీతో విజయం సాధిస్తారని బీజేపీ రాష్ట్ర అధ్యక్షుడు బండి సంజయ్ అన్నారు. శనివారం సాయంత్రం అయన ప్రకటన విడుదల చేశారు. బీజేపీ అభ్యర్థి గెలుపు కోసం కష్టపడిన కార్యకర్తలకు ధన్యవాదాలు చెప్పారు. ఉపఎన్నికల్లో టీఆర్ఎస్ పార్టీ అప్రజాస్వామికంగా, ఎన్నికల నియమావళికి విరుద్ధంగా వ్యవహరించిందని విమర్శించారు. అసత్యపు ప్రచారాలు, డబ్బులతో మభ్యపెట్టేందుకు ప్రయత్నించినా.. ఓటర్లు బీజేపీ వైపు మొగ్గు చూపారన్నారు.

చైతన్యవంతంగా ఆలోచించి ఓట్లు వేసి ప్రజలు న్యాయం వైపు నిలిచారన్నారు. టీఆర్ఎస్ పార్టీ విచ్చలవిడిగా అధికార దుర్వినియోగానికి పాల్పడ్డా,అధికార యంత్రాంగంతో ఒత్తిడి తీసుకొచ్చినా బీజేపీ కార్యకర్తలు ఎక్కడా అదరక, బెదరక ఈటల విజయం కోసం కృషి చేశారని అన్నారు.