‘పుట్టలోనుంచి పాములా ప్రగతిభవన్‌ నుంచి కేసీఆర్’

దిశ, నాగర్‎కర్నూల్: భారతీయ జనతా పార్టీకి ప్రజల్లో పెరుగుతున్న ఆదరణతోనే పుట్టలోంచి పాములా.. ముఖ్యమంత్రి కేసీఆర్ ప్రగతి భవన్ నుంచి బయటకు వస్తున్నారని ఆ పార్టీ రాష్ట్ర అధ్యక్షుడు బండి సంజయ్ అన్నారు. శుక్రవారం నాగర్ కర్నూల్ జిల్లా కేంద్రంలో భారతీయ జనతా పార్టీ కార్యాలయాన్ని ప్రారంభించిన అనంతరం మీడియా సమావేశంలో ఆయన మాట్లాడారు. పెద్ద పెద్ద డైలాగులు చెప్పి ప్రజల్ని మోసం చేసి అధికారంలోకి వచ్చిన కేసీఆర్.. అప్పట్లో చప్పట్లు కొట్టించుకున్నా.. ఇప్పుడు అవే డైలాగ్‌లతో నవ్వుల పాలు అవుతున్నారని ఎద్దేవా చేశారు. ఇచ్చిన హామీలను ఎందుకు నెరవేర్చలేదో సమాధానం చెప్పాలని బండి సంజయ్ డిమాండ్ చేశారు. వచ్చే అసెంబ్లీ ఎన్నికల లక్ష్యంగా బీజేపీ పనిచేస్తోందని.. అధికారంలోకి వచ్చేందుకు ప్రణాళికలు రూపొందిస్తున్నామని ఆయన చెప్పుకొచ్చారు. అనంతరం ఆయన బైక్ ర్యాలీలో పాల్గొన్నారు.