విజయవాడలో అపచారం.. సోషల్ మీడియాలో దుర్గమ్మ నిజస్వరూపం దృశ్యాలు

దిశ, వెబ్ డెస్క్: విజయవాడ దుర్గమ్మ ఆలయం అధికారుల నిర్లక్ష్యం బయటపడింది. ఆలయంలో కట్టుదిట్టమైన భద్రత ఏర్పాటు చేశామని చెప్పుకునే అధికారుల మాటలు వట్టివేనని తేలిపోయింది. అమ్మవారి నిజస్వరూపం దృశ్యాలు సైతం సోషల్ మీడియాలో చక్కర్లు కొడుతున్నాయి. మూడు రోజుల క్రితం దుర్గమ్మ ఆలయం వద్దకు ఓ మహిళా భక్తులు వెళ్లారు. ఆలయం చుట్టూ తిరుగుతూ దృశ్యాలను సెల్ ఫోన్లో చిత్రీకరించారు. ఆలయం వెలుపల, లోపల వీడియోలను సైతం రికార్డు చేశారు. ఆ వీడియోలను సోషల్ మీడియాలో పోస్ట్ చేశారు. ఆలయం అంతరాలయంలోని అమ్మవారి నిజరూపాన్ని సైతం సోషల్ మీడియాలో ప్రత్యక్షం కావడంతో భక్తులుమండిపడుతున్నారు. దుర్గమ్మ ఆలయంలో సెల్ ఫోన్ నిషేధమనే నిబంధన ఉన్నా అమ్మవారి నిజస్వరూపం దృశ్యాలు బయటకు రావడంపై ఆగ్రహం వ్యక్తం చేస్తున్నారు. తమ మనోభావాలు దెబ్బ తీస్తున్నారంటూ ఆవేదన వ్యక్తం చేస్తున్నారు. విధుల్లో నిర్లక్యం వహించిన అధికారులపై చర్యలు  తీసుకోవాలని డిమాండ్ చేస్తున్నారు.