BREAKING: ఎన్నికల వేళ జనసేన చీఫ్ పవన్ కల్యాణ్ మరో కీలక నిర్ణయం

దిశ, వెబ్‌డెస్క్: ఎన్నికల వేళ జనసేన అధినేత పవన్ కల్యాణ్ మరో కీలక నిర్ణయం తీసుకున్నారు. తమ పార్టీ అభ్యర్థుల గెలుపే లక్ష్యంగా జనసేన ఎన్నికల పర్యవేక్షణ కమిటీని ఏర్పాటు చేశారు. ఐదుగురు సభ్యులతో కూడిన రాష్ట్ర స్థాయి కమిటీని పవన్ ఆదివారం ప్రకటించారు. ఈ కమిటీ.. పొత్తులో భాగంగా జనసేన పోటీ చేస్తోన్న ఎంపీ, ఎమ్మెల్యే సీట్లలో కూటమి నేతల మధ్య సమన్వయం, ప్రచార వ్యవహారాలు, పోల్ బూత్ మేనేజ్మెంట్ తదితర అంశాలను పర్యవేక్షించనుంది. ఈ మేరకు పిఠాపురంలో కమిటీ సభ్యులకు పవన్ కల్యాణ్ దిశానిర్దేశం చేశారు. కాగా, జగన్ సర్కార్‌ను గద్దె దించడమే లక్ష్యంగా టీడీపీ, జనసేన, బీజేపీ పొత్తు పెట్టుకుని ఎన్నికల బరిలోకి దిగుతోన్న విషయం తెలిసిందే.

మూడు పార్టీల మధ్య ఇప్పటికే సీట్ల పంపకం సైతం పూర్తైంది. పొత్తులో భాగంగా జనసేనకు 21 అసెంబ్లీ, రెండు పార్లమెంట్ స్థానాలు దక్కాయి. జనసేన పోటీ చేయనున్న అసెంబ్లీ, పార్లమెంట్ స్థానాలకు పవన్ అభ్యర్థులను ఎంపికను పూర్తి చేశారు. ఎన్నికల తేదీ సమీపిస్తుండటంతో నేతల మధ్య సమన్వయం కోసం తాజాగా జనసేన పర్యవేక్షణ కమిటీని ఏర్పాటు ఏర్పాటు చేసింది. ఇక, పవన్ కల్యాణ్ పిఠాపురం అసెంబ్లీ నుండి ఎమ్మెల్యేగా పోటీ చేస్తోన్న విషయం తెలిసిందే. పిఠాపురంలో పవన్ కల్యాణ్ ఎన్నికల ప్రచారం సైతం ప్రారంభించారు.