మేం కాపులం.. ఎవడ్రా నువ్వు...!

దిశ,కాకినాడ జిల్లా ప్రతినిధి: ‘మేం కాపులం ఎవడ్రా నువ్వు’ అంటూ మద్యం మత్తులో కొంతమంది యువకులు వీరంగం సృష్టించారు. కోనసీమ జిల్లా కె.గంగవరం మండలం మసకపల్లిలో కార్మిక శాఖ మంత్రి వాసంశెట్టి సుభాష్‌ కాన్వాయ్‌ను కొంత మంది యువకులు అడ్డుకోవటమే కాక గంజాయి మత్తులో రెచ్చిపోయారు.వరద బాధితులను పరామర్శించడానికి మంత్రి ఈ ప్రాంతాల్లో పర్యటించేందుకు వచ్చిన సమయంలో ఈ ఘటన చోటుచేసుకుంది. తక్షణమే పోలీసులు రంగ ప్రవేశం చేసి మంత్రి వాసంశెట్టి సుభాష్‌ కాన్వాయ్‌ను ఆపి హంగామా చేసిన ఆరుగురు యువకులను అదుపులోకి తీసుకున్నారు. నిందితులంతా రాజమండ్రికి చెందిన వారిగా పోలీసులు గుర్తించారు.ఈ యువకులు మట్లపాలెం అమ్మవారి గుడికి వెళ్లి మద్యం తాగమంటూ ప్రమాణం చేసి వేసుకున్న కడియాలను సైతం తొలగించారు. యానాంలో మద్యం సేవించి రాజమండ్రికి వెళ్తున్న సమయంలో ఈ సంఘటన జరిగిందని, వారు ఇలా రెచ్చిపోయారని పోలీసులు వెల్లడించారు. యువకులను అదుపులోకి తీసుకుని కేసు నమోదు చేసి దర్యాప్తు నిర్వహిస్తున్నారు.