నేటి నుంచి రాష్ట్ర వ్యాప్తంగా అంగన్వాడీలో ఆధార్ క్యాంపులు.. చిన్న పిల్లలకు ఆధార్ కార్డులు

దిశ, వెబ్ డెస్క్: ఇటీవల అధికారంలోకి వచ్చిన కూటమి ప్రభుత్వం ప్రజా సంక్షేమం వైపు అడుగులు వేస్తుంది. ఈ క్రమంలో కేంద్ర, రాష్ట్ర పథకాల్లో కీలకమైన ఆధార్ (Aadhaar) కార్డులు లేక రాష్ట్రంలో అనేక మంది పిల్లలు తీవ్ర ఇబ్బందులు ఎదుర్కొంటున్నారు. ఇది గమనించిన రాష్ట్ర ప్రభుత్వం.. అంగన్వాడీ కేంద్రాల్లో(Anganwadi centers) ఆధార్ క్యాంపులు నిర్వహించాలని నిర్ణయించి.. కలెక్టర్లకు ఆదేశాలు జారీ చేసింది. దీంతో నేటి నుంచి రాష్ట్రంలోని అన్ని జిల్లాలలోని అంగన్వాడీ కేంద్రాల్లో ఆధార్ క్యాంపులు(Aadhaar Camps) ప్రారంభం కానున్నాయి. ఈ ఆధార్ క్యాంపులు.. నేటి నుంచి ప్రారంభమై ఈ నెల 20 వరకు కొనసాగనున్నాయి. అనంతరం డిసెంబర్ 26 నుంచి 28 వరకు రాష్ట్ర వ్యాప్తంగా నిర్వహించనున్నారు. కాగా ఈ ఆధార్ క్యాంపుల్లో కేవలం చిన్న పిల్లలకు మాత్రమే ఆధార్ కార్డులు జారీ చేయనున్నారు. రాష్ట్రంలో 0-6 ఏళ్ల వయసు గల పిల్లల్లో 11 లక్షల మంది వరకు ఆధార్ నమోదు చేసుకోలేదని గ్రామ, వార్డు సచివాలయ శాఖ తెలిపింది. ఇందులో అత్యధికంగా కర్నూలు జిల్లాలోని పిల్లలకు ఆధార్ లేదని స్పష్టం చేసింది. దీంతో ప్రభుత్వం ఈ నిర్ణయం తీసుకొగా.. ఆధార్ క్యాంపుల కోసం జిల్లా కలెక్టర్లు ఏర్పాట్లు చేసి.. ప్రత్యక్షంగా పర్యవేక్షిస్తున్నారు.