IPL 2023: అర్జున్‌ టెండూల్కర్‌ బౌలింగ్‌ను ఆట ఆడుకున్న వెంకటేశ్‌ అయ్యర్..
దిశ, వెబ్‌డెస్క్: IPL 2023లో భాగంగా ముంబైలోని వాంఖడే వేదికగా కోల్‌కతా నైట్‌రైడర్స్‌తో జరుగుతున్న మ్యాచ్‌లో క్రికెట్‌ దిగ్గజం సచిన్‌ టెండూల్కర్‌ తనయుడు అర్జున్‌ టెండూల్కర్‌ ఐపీఎల్ అరంగేట్రం చేశాడు. ఈ మ్యాచ్‌లో ఇన్నింగ్స్‌ తొలి ఓవర్‌ బౌల్‌ చేసిన అర్జున్‌.. కాస్త మెరుగ్గానే బౌలింగ్‌ చేసినప్పటికీ.. తన రెండో ఓవర్‌లో మాత్రం వెంకటేశ్‌ అయ్యర్ చేతికి చిక్కి బలయ్యాడు. ఈ ఓవర్‌లోనూ తొలి రెండు బంతులకు పరుగులేమీ ఇవ్వని అర్జున్‌.. ఆ తర్వాత బంతిని వైడ్‌ వేసి, ఆ వెంటనే వరుసగా 2 పరుగులు, 0, బౌండరీ, సిక్సర్‌ సమర్పించుకున్నాడు. ఈ ఓవర్‌లో అయ్యర్ ధాటికి మొత్తంగా 13 పరుగులు సమర్పించుకోవడంతో కెప్టెన్‌ సూర్యకుమార్‌ అర్జున్‌ను బౌలింగ్‌ నుంచి తప్పించి డ్యూయాన్‌ జన్సెన్‌కు బంతిని అప్పజెప్పాడు.
సుదీర్ఘకాలంగా ఐపీఎల్ ఎంట్రీ కోసం ఎదురుచూసిన అర్జున్‌కు ఓ మోస్తరు ప్రారంభమైతే లభించింది. ఎన్నో అంచనాల నడుమ కుటుంబ సభ్యుల సమక్షంలో బరిలోకి దిగిన అర్జున్‌ తొలి ఓవర్‌లో కేవలం 5 పరుగులు మాత్రమే ఇచ్చి పర్వాలేదనించాడు. అయితే రెండో ఓవర్‌లో మాత్రం అర్జున్‌ కాస్త తడబడ్డాడు. తన కోటా ఓవర్లు మొత్తం పూర్తయితే కాని అతను బౌలింగ్‌పై ఓ అంచనాకు రాలేని పరిస్థితి. అర్జున్‌ తొలి బంతి నుంచి రన్‌అప్‌తో ఇబ్బంది పడుతున్నట్లు కనిపించాడు. అతని శైలి ఆశిష్‌ నెహ్రాను తలపించినప్పటికీ.. బౌలింగ్‌లో మాత్రం వేగం లోపించింది. అతను బౌల్‌ చేసిన 13 బంతులు 130కిమీ వేగం లోపే ఉంది.
కేకేఆర్ నిర్ణీత 20 ఓవర్లలో 6 వికెట్ల నష్టానికి 185 పరుగులు చేసింది. కేకేఆర్ హిట్టర్ వెంకటేష్ అయ్యర్ సెంచరీతో చెలరేగాడు. 5 ఫోర్లు, 9 సిక్సర్ల సాయంతో విధ్వంకర శతకం చేశాడు. ఈ మ్యాచ్‌లో తొలి బంతి నుంచి ప్రత్యర్ధి బౌలర్లపై ఎదురుదాడికి దిగిన అయ్యర్.. కేవలం 49 బంతుల్లో 5 ఫోర్లు, 9 సిక్సర్ల సాయంతో విధ్వంకర శతకం బాదాడు. కేకేఆర్ ఇన్నింగ్స్‌లో బ్యాటర్లంతా కలిపి కేవలం 2 ఫోర్లు కొడితే, ఒక్క వెంకటేశ్‌ అయ్యరే 5 బౌండరీలు, 9 సిక్సర్లు బాదడం విశేషం. చివర్లలో రసెల్ 9 బంతుల్లో 16 చేశాడు. ముంబై బౌలర్స్‌లో.. హృతిక్ షాకీన్ 2, పీయూష్ చావ్లా, జాన్సన్, గ్రీన్, మెరిడిత్ తలో వికెట్ తీశారు.