గంజాయి స్మగ్లర్ల అరెస్ట్.. 32లక్షల విలువ గల గంజాయి స్వాధీనం

దిశ, కాళోజి జంక్షన్ : వరంగల్ పోలీస్ కమిషనరేట్ పరిధిలో మూడు వేర్వేరు సంఘటనల్లో గంజాయి స్మగ్లింగ్ కు పాల్పడుతున్న 11మంది నిందితులను టాస్క్ ఫోర్స్ పోలీసులు అరెస్టు చేశారు. వీరి నుండి సుమారు 32 లక్షల విలువైన 318 కిలోల గంజాయితో పాటు రెండు కార్లు, మూడు ఆటోలు, 11 సెల్ ఫోన్లను పోలీసులు స్వాధీనం చేసుకున్నారు. వరంగల్ పోలీస్ కమిషనర్ తరుణ్ జోషి వివరాలను వెల్లడించారు. ఆంధ్రప్రదేశ్‌లోని పశ్చిమ గోదావరి జిల్లా కు చెందిన బోరం సాయికుమార్, గాటంపల్లి వెంకట్, గోదవర్తి శేషుకుమార్, మహబూబాబాద్ జిల్లా కు చెందిన భూక్యా రాముల, ఎస్.కె. కలిల్, కరీంనగర్ జిల్లాకు చెందిన సునీల్, భద్రాద్రి కొత్తగూడెం జిల్లా సారపాక కు చెందిన బత్ర నరేష్, తూముల క్రాంతికుమార్, తమ్మల నాగరాజు, జి.మనోజ్, మారంపూడి శ్రీను లను అరెస్టు చేసినట్లు పోలీసులు తెలిపారు.

నిందితులు జల్సాలకు అలవాటు పడి సులభంగా డబ్బు సంపాదించాలనే ఆలోచనతో ముఠాలుగా ఏర్పడి ఆంధ్ర, ఒడిషా సరిహద్దు రాష్ట్రాల్లో సిలేరు, మోతుగూడెం ప్రాంతాల్లో గుర్తుతెలియని వ్యక్తుల వద్ద తక్కువ ధరకు గంజాయిని కోనుగోలు చేసి రహస్యంగా కారులో విశాఖపట్నం, రాజమండ్రి, భద్రాచలం, కొత్తగూడెం, నర్సంపేట, ఖమ్మం పట్టణాల మీదుగా ఇతర ప్రాంతాలకు తరలించి ఎక్కువ ధరకు గంజాయిని అమ్మి సొమ్ము చేసుకోవాలనుకొన్నారు.

గంజాయి స్మగ్లింగ్ కు పాల్పడుతున్నట్లుగా టాస్క్ ఫోర్స్ పోలీసులకు పక్కా సమాచారం రావడంతో వర్థన్నపేట పోలీసులతో కల్సి వరంగల్-ఖమ్మం ప్రధాన రోడ్డు మార్గంలోని డీసీ తండా వద్ద వాహన తనీఖీలు నిర్వహించగా నిందితుల కారు నుండి సూమారు 128 కిలోల గంజాయి పట్టుపడగా, మరో సంఘటనలో టాస్క్ ఫోర్స్ పోలీసులు నల్లబెల్లి పోలీసులతో నల్లబెల్లి శివారు ప్రాంతంలోని రామతీర్థం గ్రామ శివారులో నిర్వహించిన వాహనతనీఖీల్లో నిందితులు ఒక కారు, ఆటోలో 134 కిలోల గంజాయి స్మగ్లింగ్ కు చేస్తూ పోలీసులకు చిక్కారు.

మూడవ సంఘటనలో టాస్క్ ఫోర్స్ పోలీసులు ఖానాపూర్ పోలీసులతో ఖానాపూర్ గ్రామ శివారు ప్రాంతంలో నిర్వహించిన వాహన తనిఖీల్లో నిందితులు రెండు ఆటోల్లో 56కిలోల గంజాయిని తరలిస్తూ పోలీసులకు దొరికిపోయారన్నారు. మూడు సంఘటనల్లో నిందితులను పట్టుకోవడంలో ప్రతిభ కనబరిచిన పోలీసులను సీపీ అభినందిచారు.