IPL 2023: చెన్నై ఫ్యాన్స్‌కు గుడ్ న్యూస్.. రిటైర్మెంట్‌పై ధోనీ క్లారిటీ
లక్నో: చెన్నయ్ సూపర్ కింగ్స్ కెప్టెన్ ఎంఎస్ ధోనీకి ఐపీఎల్-16 చివరి సీజన్ అని లీగ్ ప్రారంభానికి ముందు నుంచే వార్తలు వస్తున్నాయి. ఈ సీజనే కాదు.. గత రెండు సీజన్లుగా ధోనీ రిటైర్మెంట్ తీసుకోబోతున్నాడని చర్చ జరగడం కామన్ అయిపోయింది. అయితే, రిటైర్మెంట్‌పై మాత్రం ధోనీ స్పష్టతనివ్వడం లేదు. ఇటీవల కెరీర్‌ చివరి దశలో ఉన్నానని ధోనీ వ్యాఖ్యానించడంతో ఈ సీజన్ తర్వాత వీడ్కోలు పలుకడం ఖాయమే అతని ఫ్యాన్స్ నిరాశ చెందారు.
కానీ, తాజాగా అతను చేసిన వ్యాఖ్యలు క్రికెట్ అభిమానుల్లో జోష్ నింపాయి. లక్నోతో మ్యాచ్‌కు ముందు టాస్ సమయంలో కామెంటేటర్ డానీ మోరిసన్.. చివరి సీజన్‌ను ఎలా ఎంజాయ్ చేస్తున్నారు? అని ధోనీని ప్రశ్నించాడు. దీనికి ధోనీ స్పందిస్తూ.. ‘ఇది నా ఐపీఎల్ చివరి సీజన్ అని మీరు నిర్ణయించారు. నేను కాదు’ అని బదులిచ్చాడు. ధోనీ వ్యాఖ్యల ప్రకారం.. ఈ సీజన్ తర్వాత అతను రిటైర్మెంట్ ప్రకటించాలని ఇంకా నిర్ణయం తీసుకోలేదని తెలుస్తోంది. ఈ సీజన్ తర్వాత ధోనీ ఆటగాడిగా వీడ్కోలు పలికినా.. సీఎస్కేకు కోచ్‌గా లేదా మెంటార్‌గా ఉండే అవకాశం ఉందని క్రికెట్ విశ్లేషకులు అభిప్రాయపడుతున్నారు.
