అంగడికి వెళ్తుండగా అనంతలోకాలకు

దిశ, కామారెడ్డి : కామారెడ్డికి కూరగాయలు తీసుకురావడానికి సంతకు (అంగడి) మోటార్ సైకిల్ పై స్నేహితునితో కలిసి వెళ్తుండగా వెనుక నుంచి వస్తున్న గుర్తు తెలియని వాహనం ఢీకొనడంతో ఓ యువకుడు అక్కడికక్కడే మృతి చెందాడు. మరొకరికి గాయాలయ్యాయి. దేవునిపల్లి పోలీసులు, స్థానికుల కథనం మేరకు వివరాలు ఇలా ఉన్నాయి. కామారెడ్డి మండలం చిన్నమల్లారెడ్డి గ్రామానికి చెందిన కుమ్మరి రాజశేఖర్ (30) అనే యువకుడు తన స్నేహితుడు రాజుతో కలిసి వ్యవసాయ పొలం నుంచి కూరగాయలు తీసుకురావడానికి కామారెడ్డికి బయలు దేరారు.

క్యాసంపల్లి శివారులో జాతీయ రహదారిపై నిజామాబాద్ వైపు వెళ్తున్న గుర్తు తెలియని వాహనం ఢీకొనడంతో రాజశేఖర్ అక్కడికక్కడే మరణించాడు. కాగా మరొకరు అయిన రాజుకి గాయాలయ్యాయి. కాగా మృతుని తండ్రి చిన్నప్పుడే చనిపోగా కుటుంబ బాధ్యతలు ఇతనిపైనే పడ్డాయి. అయితే ఇతనికి ఇద్దరు కూతుళ్లు ఉన్నారు. ఈ మేరకు దేవునిపల్లి పోలీసులు కేసు నమోదు చేసుకుని దర్యాప్తు చేస్తున్నారు.