రేబిస్‌తో ‘15’ మంది మృతి.. రికార్డులో ఎక్కించని వైద్యశాఖ

దిశ, తెలంగాణ బ్యూరో : కుక్కకాటుతో ప్రబలే రేబిస్​వ్యాధితో రాష్ర్ట వ్యాప్తంగా ఈ ఏడాదిలో ఇప్పటి వరకు 15 మంది మృతి చెందినట్టు సమాచారం. కానీ వైద్యారోగ్యశాఖ రికార్డుల్లో ఆ వివరాలను నమోదు చేయలేదు. తెలంగాణలో ‘రేబిస్​ వ్యాధిని ఎలిమినేషన్’​ చేశామని గొప్పలు చెప్పుకునేందుకే ఎంట్రీ చేయలేదని ఆ విభాగంలోని కొందరు అధికారులు ఆఫ్ ది రికార్డులో చెబుతున్నారు. పరిస్థితిని కుణ్ణంగా వివరించి ప్రజలకు అవగాహన చేయాల్సిన అధికారులు ఇలా చేయడం పై ఆ శాఖలోనూ విమర్శలు వినిపిస్తున్నాయి. ఇది ముమ్మాటికీ ప్రజల ప్రాణాలతో చెలగాటమేనని అభిప్రాయాలు వ్యక్తం అవుతున్నాయి. ప్రభుత్వ మెప్పు పొందేందుకు ప్రజారోగ్యశాఖలోని కొందరు అధికారులు ఇలా విధుల్లో నిర్లక్ష్యం చూపుతున్నారు. తప్పుడు లెక్కలు చూపుతున్న అధికారులపై చర్యలు తీసుకోవాలని క్షేత్రస్థాయి సిబ్బంది కోరుతున్నారు.

9 నెలల్లో 98 వేల కేసులు

రాష్ట్ర వ్యాప్తంగా గడిచిన 9 నెలల్లో 98,200 డాగ్ బైట్ కేసులు నమోదయ్యాయి. దీనిలో అత్యధికంగా హైదరాబాద్‌‌‌‌ జిల్లాలో 15,240 కేసులు ఉండగా, ఆ తర్వాత జగిత్యాల జిల్లాలో 8,521 కేసులు, సంగారెడ్డిలో 6,800 కేసులు నమోదైనట్లు అధికారిక లెక్కలు చెబుతున్నారు. మిగతా జిల్లాల్లో సగటున 5 వేల కేసులు చొప్పున తేలాయి. ఈ ఏడాది భారీ స్థాయిలో కుక్కకాటు కేసులు నమోదవుతున్నా, అధికారుల్లో నిర్లక్ష్యం స్పష్టం కనిపిస్తున్నది. కరోనా నియంత్రణ చర్యల్లో పడి, ఇతర రోగాలను మర్చిపోయారు. ముఖ్యంగా ఇలాంటి ప్రాణాంతక డీసీజెస్​ను లైట్​ తీసుకోవడం వలన రాబోయే రోజుల్లో ప్రజలకు ప్రమాదం వాటిల్లే అవకాశం ఉన్నదని ఎక్స్​పర్ట్స్​ చెబుతున్నారు.

వ్యాక్సిన్​ తప్పనిసరి…

కుక్క కరిచినవాళ్లు యాంటీ రేబిస్ వ్యాక్సిన్ ను తప్పనిసరిగా తీసుకోవాలని డాక్టర్లు చెబుతున్నారు. ఈ వ్యాధి బారిన పడితే బతికే ఛాన్స్​తక్కువ కావున కచ్చితంగా రేబిస్​టీకాను పొందాల్సిందేనని ఆరోగ్యశాఖ పలుమార్లు పేర్కొంటున్నది. కానీ చాలా మంది అవగాహన లోపంతో స్థానికంగా ఉండే క్లినిక్​లలో మందులు వాడి, ఏం కాదులే అనే భావనతో టీకా తీసుకోవడం లేదంటున్నారు. ఇది సరైన పద్ధది కాదని వారు సూచిస్తున్నారు. కుక్క కాటు వేయగానే వెంటనే ప్రభుత్వ కేంద్రాల్లో ఉన్న టీకాను పొందాలంటున్నారు. దీని వలన రేబిస్​వ్యాధి ప్రభావం ఇతర అవయవాలపై ఉండదని డాక్టర్లు స్పష్టం చేస్తున్నారు. ప్రతి పీహెచ్‌సీ స్థాయి నుంచే ఇవి అందుబాటులో ఉన్నట్లు పేర్కొంటున్నారు. ఇక హైదరాబాద్​ లో ని ఫీవర్, ఐపీఎంలలో రేబిస్​వ్యాక్సిన్​కు ప్రత్యేక కేంద్రాలు ఉన్నాయని వైద్యారోగ్యశాఖ చెబుతున్నది. ఇదిలా ఉండగా రేబిస్​ వ్యాధిని నియంత్రించేందుకు కేంద్రం ప్రభుత్వం నేషనల్ హెల్త్ మిషన్‌ ద్వారా ప్రతీ ఏటా కొన్ని ప్రత్యే క నిధులను కేటాయిస్తున్నది. కానీ ప్రభుత్వం, వైద్యశాఖ కుక్కకాటు నియంత్రణ చర్యలు చేపట్టిన దాఖలాలు లేవని స్వయంగా హెల్త్​ ఆఫీసర్లే క్లారిటీ ఇచ్చారు.

నెలకు 3 కేసులు వస్తున్నాయి….

కుక్కకాటు అనంతరం ఐపీఎం( ఇన్​స్టిట్యూట్‌‌‌‌ ఆఫ్ ప్రీవెంటీవ్)కు ప్రతీ నెల ముగ్గురు రేబిస్​పేషెంట్లు వస్తున్నట్టు అక్కడి అధికారులు తెలిపారు. ఈ ఏడాదిలో రాష్ర్ట వ్యాప్తంగా అన్ని ప్రభుత్వ ఆసుపత్రుల్లోనూ ఇదే పరిస్థితి ఉన్నట్లు చెబుతున్నారు. అయితే ఒకసారి వ్యాక్సిన్ తీసుకుంటే మూడేళ్ల వరకు రేబిస్ సోకే అవకాశం ఉండదని డైరెక్టర్​ డా శంకర్​ తెలిపారు. అయితే రోడ్ల మీద వెళ్లేటపుడు కుక్కలతో జాగ్రత్తగా వ్యవహరించాలన్నారు. ముఖ్యంగా చిన్నపిల్లలను ఒంటరిగా ఎట్టి పరిస్థితుల్లో బయటకు పంపించవద్దని సూచించారు. రాత్రి వేళల్లో మరింత అప్రమత్తంగా ఉండాలన్నారు.