ప్రపంచంలోనే అత్యంత ఖరీదైన ఐస్క్రీమ్.. ధర ఎంతో తెలిస్తే షాక్ అవడం ఖాయం? (వీడియో)
దిశ, వెబ్ డెస్క్: ప్రస్తుతం ఎండలు దంచికొడుతున్నాయి. రోజు రోజుకు ఉష్ణోగ్రతలు పెరుగుతూ ప్రజలను బెంబేలెత్తిస్తున్నాయి. దీంతో జనాలు బయటకు వెళ్లాలంటే జంకుతున్నారు. అయితే ఇంట్లోనే ఉంటూ చల్ల చల్లని పదార్థాలను ఆరగించాలని అనుకుంటుంటారు. ఈ క్రమంలో చిన్నా పెద్ద ఎక్కువగా ఐస్‌క్రీమ్‌లకు ప్రాధాన్యతను ఇస్తారు. వీటి ధరలు మహా అయితే వందల్లో, మరీ స్పెషల్ అయితే వేలల్లో ఉంటాయి. కానీ, ఈ ఐస్క్రీమ్ ధర ఎంతో తెలిస్తే నోరెళ్లబెట్టడం ఖాయమట.
జపాన్‌కు చెందిన పాపులర్ ఐస్క్రీమ్ బ్రాండ్ తయారు చేసిన డెసర్ట్ ధర ఏకంగా రూ. 5.2 లక్షలకు పైగానే ఉంటుందట. ఇది అత్యంత ఖరీదైన ఐస్‌క్రీమ్‌గా గిన్నిస్ వరల్డ్ రికార్డ్ కూడా సృష్టించింది. బైకుయా ఐస్క్రీమ్ ధర ఇంత ఎక్కువగా ఉండటానికి కారణం, దాని తయారీలో వాడిన ప్రత్యేక పదార్థాలు. ఐస్క్రీమ్ కోసం ఇటలీలోని ఆల్బాలో పండించిన అరుదైన వైట్ ట్రఫుల్ వినియోగించారు. దీని ధర కిలోకు 2 మిలియన్ జపనీస్ యెన్ (సుమారు రూ.11.9 లక్షలు) ఉంటుంది. ఎడిబుల్ గోల్డ్, పార్మి జియానో రెగ్జియానో, సేక్ లీస్ వంటి ఇతర ప్రత్యేక పదార్థాలను దీని తయారీకి వాడారు. దీన్ని జపాన్‌లో OMER తయారు చేసింది. ఈ విషయాన్ని పేర్కొంటూ గిన్నిస్ వరల్డ్ రికార్డ్ ఒక వీడియోను షేర్ చేసింది. దీంతో అది చూసిన వారు షాక్ అవుతున్నారు.
