ప్రమాదాలు ఒకే తీరు.. మృతులు ముగ్గురు

దిశ, నల్లగొండ: ఈత సరదా విషాదం నింపింది. ఉమ్మడి నల్లగొండ జిల్లాలో వేర్వేరు చోట్ల ఈతకెళ్లి ముగ్గురు ప్రాణాలు కోల్పోయారు. సూర్యాపేట జిల్లా మేళ్లచెరువు మండల కేంద్రంలోని ఓ చెరువులో షేక్ హుస్సేన్ అనే యువకుడు తన స్నేహితులతో కలిసి ఈతకు వెళ్లాడు. మిత్రులతో పోటీపడి మరి ఈత కొట్టే సమయంలో చెరువు మధ్యలో చిక్కుకుపోయాడు. స్నేహితులు రక్షించేందుకు ప్రయత్నించినప్పటికీ నీటిలో మునిగిపోయాడు. గల్లంతైన హుస్సేన్ కోసం పోలీసులు గాలింపు చర్యలు చేపట్టారు. అలాగే నల్లగొండ జిల్లా శాలిగౌరారం మండలం మంగమ్మగూడెంలో ఓ బావిలో ఈతకు వెళ్లిన ప్రణయ్ అనే యువకుడు నీటిలో మునిగి ఊపిరాడక చనిపోయాడు. మృతదేహం కోసం బావిలో పోలీసులు, ఫైర్ సిబ్బంది గాలిస్తున్నారు. మరో ఘటనలో ముదిమాణిక్యం మేజర్ కాల్వలో యువకుడు గల్లంతయ్యాడు. మాడుగులపల్లి మండలం కన్నెకల్‌కు చెందిన తండ నరేశ్ అనే యువకుడు దుగ్గేపల్లిలో ఓ పెళ్లికి వచ్చి ఈత కోసం మేజర్ కాల్వలోకి దిగాడు. నీటిలో మునిగి గల్లంతయ్యాడు. మృతదేహం కోసం పోలీసులు గాలిస్తున్నారు.