బిగ్ బ్రేకింగ్: ఏపీలో ఘోర ప్రమాదం.. 10 మంది దుర్మరణం?
దిశ, వెబ్‌డెస్క్: ఏపీలో ఘోర రోడ్డు ప్రమాదం జరిగింది. తిరుపతి జిల్లా చంద్రగిరి మండలం భాకరా పేట ఘాట్‌ రోడ్డులో అదుపుతప్పిన టూరిస్ట్ బస్సు లోయలో పడింది. ఈ ప్రమాదంలో బస్సు డ్రైవర్ సహా 9 మంది దుర్మరణం చెందినట్లు తెలుస్తోంది. ప్రమాద సమయంలో బస్సులో మొత్తం 50 మంది ప్రయాణికులు ఉన్నట్లు సమాచారం. రాత్రి సమయం కావడంతో బస్సు లైట్లు సరిగా కనపడకపోవడం మూలంగానే ప్రమాదం జరిగి ఉంటుందని స్థానికులు అనుమానిస్తున్నారు. విషయం తెలుసుకున్న పోలీసులు హుటాహుటిన ఘటనా స్థలానికి చేరుకొని సహాయక చర్యలు చేపట్టారు. ధర్మవరం నుంచి తిరుపతి వైపు వెళ్తున్న పెళ్లి బస్సుగా పోలీసులు గుర్తించారు. రేపు ఉదయం తిరుపతిలో ఎంగేజ్‌మెంట్ ఉన్నట్లు తెలిసింది. కాగా, పెళ్లికొడుకు సైతం బస్సులోనే ఉన్నట్లుగా పోలీసులు అనుమానిస్తున్నారు. విషయం తెలుసుకున్న వెంటనే అంబులెన్సు సిబ్బంది మూడు అంబులెన్సులతో ఘటనా స్థలానికి చేరుకొని క్షతగాత్రులను దగ్గర్లోని ఆస్పత్రికి తరలించారు. బస్సు 300 అడుగుల లోతులోనుంచి పడిపోవడంతో మృతులు సంఖ్య పెరిగే అవకాశం ఉందని పోలీసులు అనుమానిస్తున్నారు. ప్రమాదానికి సంబంధించిన పూర్తి వివరాలు తెలియాల్సి ఉంది.
