`నేను గెలిస్తే పార్టీ మధ్య వారధి నిర్మిస్తా`: మార్గరెట్ అల్వా
న్యూఢిల్లీ: విపక్షాల ఉమ్మడి ఉపరాష్ట్రపతి అభ్యర్థి మార్గరెట్ అల్వా కీలక ప్రకటన చేశారు. తాను ఎన్నికల్లో గెలిస్తే అన్ని రాజకీయ పార్టీల మధ్య వారధి నిర్మించే దిశగా పని చేస్తానని అన్నారు. ఈ మేరకు అన్ని పార్టీల ఎంపీలనుద్దేశించి రాసిన లేఖను సోమవారం ఆమె ట్వీట్ చేశారు. 'ఉపరాష్ట్రపతిగా ఎన్నికైతే, రాజ్యాంగాన్ని పరిరక్షించడానికి, మన పార్లమెంటరీ ప్రజాస్వామ్యాన్ని బలోపేతం చేయడానికి అవిశ్రాంతంగా పని చేయడానికి నేను కట్టుబడి ఉన్నాను. రాజ్యసభ ఛైర్‌పర్సన్‌గా, వివిధ రాజకీయ పార్టీల మధ్య వంతెనలు నిర్మించడానికి, జాతీయ ప్రాముఖ్యత ఉన్న అంశాలపై ఏకాభిప్రాయాన్ని ఏర్పరచడానికి పార్లమెంటు కీర్తిని పునరుద్ధరించడానికి నేను కృషి చేస్తాను' అని మార్గరెట్ అల్వా పేర్కొన్నారు. ప్రస్తుతం పార్లమెంటులో సభ్యుల మధ్య కమ్యూనికేషన్ దెబ్బతిందని అన్నారు. అపనమ్మకం, కోపం, వ్యక్తిగత దాడులు, దుర్వినియోగం లేకుండా కీలకమైన జాతీయ ప్రాముఖ్యత ఉన్న సమస్యలపై చర్చించలేని అసమర్థత నేడు దేశంలో ఉందన్నారు. అయితే ఈ నెల 6న ఉపరాష్ట్రపతి ఎన్నిక జరగనున్న సంగతి తెలిసిందే. ఎన్డీఏ తరుఫున బెంగాల్ మాజీ గవర్నర్ జగదీప్ ధన్కర్ బరిలో ఉన్నారు.
