ఈవీల కోసం BPCL రూ. 200 కోట్ల పెట్టుబడి!

ముంబై: దేశీయ ప్రభుత్వ రంగ చమురు మార్కెటింగ్ సంస్థ భారత్ పెట్రోలియం కార్పొరేషన్ లిమిటెడ్(బీపీసీఎల్) ఎలక్ట్రిక్ వాహనాల కోసం కొత్తగా 100 ఫాస్ట్ ఛార్జింగ్ కారిడార్‌లను ఏర్పాటు చేయనున్నట్టు బుధవారం ప్రకటించింది. దీనికోసం కంపెనీ సుమారు రూ. 200 కోట్ల పెట్టుబడి పెట్టనున్నట్టు ఓ ప్రకటనలో తెలిపింది. ఈ కారిడార్‌లు అత్యంత రద్దీగా ఉండే 100 నేషనల్ హైవేల్లో 2,000 ఛార్జింగ్ స్టేషన్లను కలిగి ఉంటాయని పేర్కొంది. వీటి ఏర్పాటును 2023, మార్చి నాటికి పూర్తి చేయాలని భావిస్తున్నామని, అంతేకాకుండా దీర్ఘకాలానికి 2024-25 నాటికి మొత్తం 7,000 ఫాస్ట్ ఈవీ ఛార్జింగ్ స్టేషన్లను కలిగి ఉండేలా ప్రణాళిక సిద్ధం చేసినట్లు బీపీసీఎల్ రిటైల్ ఎగ్జిక్యూటివ్ డైరెక్టర్ బీఎస్ రవి బుధవారం వివరించారు.

కంపెనీ ఇటీవలే తన మొదటి ఈవీ ఛార్జింగ్ కారిడార్‌ను చెన్నై-తిరుచీ-మధురై రహదారిలో ప్రారంభించింది. రాబోయే రెండు నెలల్లో కొచ్చి-సేలం ప్రాంతంలో రెండో కారిడార్, ముంబై-బెంగళూరు రహదారిలో మూడో కారిడార్ ఉంటుందని రవి చెప్పారు. భవిష్యత్తులో ఈవీ పరిశ్రమ అంచనా వేసిన దాని కంటే వేగంగా వృద్ధి చెందుతుందని, ఈ నేపథ్యంలోనే ఈవీ విభాగంలో మార్కెట్ లీడర్‌గా ఉండేందుకు కంపెనీ ఈవీ మౌలిక సదుపాయాలను ఏర్పాటు చేస్తుందని రవి వివరించారు. అలాగే, పరిశ్రమ ఇంకా ప్రారంభ దశలోనే ఉన్న కారణంగా కేంద్ర, రాష్ట్ర ప్రభుత్వాల నుంచి ప్రోత్సాహకాలను ఆశిస్తున్నట్టు రవి తెలిపారు.