తిమ్మాయి చెరువును మింగేశారు

దిశ,మహేశ్వరం : మహేశ్వరం మండలం హైదారాబాద్ నగరానికి కూతవేట దూరంలో ఉండటంతో ఇక్కడి భూముల ధరలు కోట్ల రూపాయలు పలుకుతున్నాయి. దీంతో అక్రమార్కులు, రియల్టర్ల కన్ను సహజ సిద్ధగా ఉన్న చెరువులను, వాగులను కబ్జాలు చేస్తూ వెంచర్లు నిర్మాణం చేస్తున్నారు. వెంచర్ నిర్మాణం చేసేటప్పుడు వెంచర్ పక్కనే చెరువు ఉంటే చెరువు శిఖం భూమిని వెంచర్ లో కలుపుకొని చెరువు శిఖం భూమిలో ప్రహరీ గోడను నిర్మించారు. రంగారెడ్డి జిల్లా మహేశ్వరం మండలం తుమ్మలూరు గ్రామ రెవెన్యూ పరిధిలోని సర్వే నంబర్ 144 లో తిమ్మాయి చెరువు (మక్త చెరువు, తిమ్మాజీ చెరువు) రెవెన్యూ రికార్డుల ప్రకారం 34.05 ఎకరాలు ఉంది.

చెరువును పక్కనే 145,146,147,148,149 సర్వే నంబర్లలో సాయిప్రియ వెంచర్ ఉంది. నిర్వాహకులు వెంచర్ నిర్మాణం చేసే క్రమంలో చెరువులోకి వచ్చే వాగులను మట్టితో పూడ్చి వేశారు. శిఖం భూమిలో ప్రహరీ గోడ నిర్మించారని, ఎఫ్టీఎల్ పరిధిలోనే నిర్మాణం చేపట్టారని తుమ్మలూరు గ్రామానికి చెందిన పలువురు రైతులు ఆరోపిస్తున్నారు. ఇరిగేషన్, రెవెన్యూ శాఖ అధికారులు చెరువు పూర్తి ఎఫ్టీఎల్ ను నిర్దారించాలని, తిమ్మాయి చెరువు పై హైడ్రా అధికారులు ప్రత్యేక దృష్టి పెట్టాలని గ్రామస్తులు కోరుతున్నారు.

హెచ్ఎంఢీ ఏ, డీటీసీపీ నిబంధనలు తూచ్...?

హెచ్ ఎంఢీఏ, ఢీటీసీపీ వెంచర్ నిర్మాణం చేపట్టలాంటే ఇంటర్నల్ రోడ్డు 33 ఫీట్లు, అప్రోచ్​ రోడ్డు 45 ఫీట్లు, అండర్ గ్రౌండ్ డ్రైనేజీ, విద్యుత్, వాటర్ సౌకర్యం లాంటి వసతులు కల్పించాలి. హెచ్ఎమ్డీఏ, ఢీటీసీపీ నిబంధనలు ఏమీ పాటించకుండా ప్లాట్లను అమ్ముతున్నారు. మరో పక్క సాయిప్రియ వెంచర్లో హెచ్ఎం డీఏ ఒక బ్లాక్, డీటీసీపీ బ్లాక్ నిర్మాణం చేపట్టారు. హెచ్ ఎండీఏ ఒక బ్లాక్, డీటీసీపీ ఒక బ్లాక్ అని వినియోగదారులకు చెప్పి ప్లాట్లు అమ్ముతున్నారు.

రైతులు వెళ్లే దారి మూసివేత?

సాయిప్రియ వెంచర్ నిర్వాహకులు వెంచర్ చుట్టూ ప్రహరీ గోడ, కంచె వేయడంతో(ఫెన్సింగ్) వెంచర్ వెనకాల భూములు ఉన్న రైతులు తమ పొలాలకు వెళ్లే దారి, చెరువు వద్దకు వెళ్లే దారి లేకుండా పోయిందని ఆవేదన వ్యక్తం చేస్తున్నారు. తమ పొలాల్లోకి వెళ్లాలంటే వెంచర్ మెయిన్ గేట్ వద్ద వారి అనుమతి తీసుకోవాల్సి వస్తుందని పేర్కొంటున్నారు.

పూర్తి ఎఫ్టీఎల్ పరిధిని నిర్ధారించాలి : కటికల శ్రీహరి, మాజీ ఉప సర్పంచ్

తుమ్మలూరు ఇరిగేషన్, రెవెన్యూ శాఖ అధికారులు తిమ్మాయి చెరువు (తిమయ్య చెరువు) పూర్తి ఎఫ్టీఎల్ పరిధిని నిర్ధారించాలి. తిమ్మాయి చెరువు ఎఫ్టీఎల్ పరిధిలో నిర్మాణం చేపట్టిన సాయిప్రియ వెంచర్ నిర్వాహకులపై చట్టపరమైన చర్యలు తీసుకోవాలి.