నిమిషం లేట్ అయినందుకు మిస్ అయిన నాలుగు ఓట్లు
దిశ, బడంగ్పేట్ : తిరుపతిలో స్వామి వారి దర్శనానికి వెళ్లి వచ్చే సరికి పోలింగ్ సమయం ముగియడంతో నాలుగు ఓట్లు వేయలేక పోయిన ఘటన బడంగ్ పేట్ లో గురువారం సాయంత్రం జరిగింది. వివరాలలోకి వెళితే బడంగ్ పేట్కు చెందిన ఓ కుటుంబం స్వామి వారి దర్శనానికి తిరుపతికి వెళ్ళారు. తమ ఓటుహక్కును ఎలాగైనా వినియోగించుకోవాలని సదరు కుటుంబంలోని నలుగురు మహిళలు రైలులో హైదరాబాద్కు చేరుకున్నారు.
బడంగ్పేట్లోని జిల్లా పరిషత్ హైస్కూల్లోని పోలింగ్ బూత్ వద్దకు సరిగ్గా 5 గంటలకు చేరుకున్నారు. ఓటువేయడానికి లోనికి వెల్లేందుకు ప్రయత్నించగా గేటు వద్ద పోలీసులు అడ్డుకున్నారు. నిబంధనల ప్రకారం ఉదయం 7 గంటల నుంచి సాయంత్రం 5 గంటల వరకు మాత్రమే ఓటు హక్కును వినియోగించుకోవాలని, ఎట్టి పరిస్థితుల్లోను లోనికి అనుమతించమని పోలీసులు తెగేసి చెప్పగా, రైలు ఆలస్యమవ్వడం వలనే తాము ఓటు హక్కు వినియోగించుకోలేక పోయామని సదరు మహిళలు బాధపడుతు వెళ్లిపోయారు.
