పల్స్ పోలియోకు ఏర్పాట్లు పూర్తి

దిశ, నడిగూడెం: జాతీయ పల్స్ పోలియో కార్యక్రమ నిర్వహణకు ఏర్పాట్లు పూర్తి చేశామని మండల వైద్యాధికారిణి లక్ష్మీ ప్రసన్న తెలిపారు. పోలియో చుక్కల ఆవశ్యకత గురించి శనివారం పలు గ్రామాల్లో చిన్నారుల తల్లిదండ్రులకు అవగాహన కల్పించినట్లు పేర్కొన్నారు. ఈ సందర్భంగా ఆమె మాట్లాడుతూ ఆదివారం మండల వ్యాప్తంగా 26 బూత్‌లలో నిర్వహించే ఈ కార్యక్రమంలో అప్పుడే పుట్టిన బిడ్డ నుంచి ఐదేళ్ల లోపు పిల్లలందరికీ పోలియో చుక్కలు వేయించాలని ఆమె చిన్నారుల తల్లిదండ్రులను కోరారు. 4, 5 తేదీల్లో ఇంటింటి కార్యక్రమం చేపడతామని, వైద్య సిబ్బంది, అంగన్వాడీ టీచర్లు, ఆశా కార్యకర్తలు సమన్వయంతో పని చేసి ఈ కార్యక్రమాన్ని విజయవంతం చేయాలని సూచించారు. అనంతరం నిర్వహించిన ర్యాలీ కార్యక్రమంలో నడిగూడెం పల్లె దవాఖాన వైద్యుడు హరనాథ్ పాల్గొన్నారు.