కల్వకుర్తిలో రాహుల్ గాంధీ సభకు భారీగా ఏర్పాట్లు
దిశ, కల్వకుర్తి: ఎన్నికల ప్రచారంలో భాగంగా బుధవారం కల్వకుర్తి అసెంబ్లీ నియోజకవర్గ కేంద్రంలో భారీ బహిరంగ సభ నిర్వహణకు ఏఐసీసీ అధినేత రాహుల్ గాంధీ హాజరుకానున్నారు. ఈ సభను విజయవంతం చేసేందుకు కాంగ్రెస్ శ్రేణులు సన్నద్ధం అవుతున్నారు. సాయంత్రం మూడు గంటల నుండి ఆరంభం కానున్న ఈ సభకు కల్వకుర్తి అసెంబ్లీ నియోజకవర్గం నుండి జనాన్ని భారీ ఎత్తున సమీకరించేందుకు కల్వకుర్తి అసెంబ్లీ నియోజకవర్గం కాంగ్రెస్ పార్టీ అభ్యర్థి కసిరెడ్డి నారాయణరెడ్డి ఆధ్వర్యంలో ఏర్పాట్లు ముమ్మరంగా సాగుతున్నాయి.
ఏఐసీసీ కార్యదర్శి డాక్టర్ వంశీచంద్ర రెడ్డి, జడ్పీ వైస్ చైర్మన్ బాలాజీ సింగ్, యువనేత రాఘవేందర్ రెడ్డి పర్యవేక్షణలో సాగుతున్న ఈ కార్యక్రమాన్ని దిగ్విజయవంతం చేసేందుకు నియోజకవర్గంలోని ఆయా మండలాల నాయకులు, కార్యకర్తలు ముమ్మరంగా ఏర్పాట్లు చేస్తున్నారు. జనం పెద్దఎత్తున హాజరయ్యే నేపథ్యంలో ఎటువంటి ఆటంకాలు ఎదురు కాకుండా ఉండేందుకు వీలుగా పోలీసులు ముందస్తుగా పార్కింగ్, తదితర ఏర్పాట్లు చేస్తున్నారు.
