గ్యారంటీలపై KTR ట్వీట్.. రేవంత్ రెడ్డి స్ట్రాంగ్ కౌంటర్!
దిశ, వెబ్ డెస్క్ : కాంగ్రెస్ ప్రకటించిన ఆరు గ్యారంటీలపై ఎక్స్ (ట్విట్టర్) వేదికగా మంత్రి కేటీఆర్ ఫైర్ అయ్యారు. కాంగ్రెస్ కు అధికారం ఇస్తే జరిగేది ఇదే అంటూ వ్యంగ్యంగా ట్వీట్ చేశారు. ఈ ట్వీట్‌కు టీపీసీసీ చీఫ్ రేవంత్ రెడ్డి కౌంటర్ ఇచ్చారు.
‘తెలంగాణ కోసం తల్లి సోనియమ్మ ఇచ్చిన ఆరు గ్యారంటీలను చూసి, అర్ధరాత్రి నుంచి అంగీలు చింపుకుంటున్న అయ్యా, కొడుకులకు.. రాహుల్ గాంధీ చెప్పిన విధంగా రాబోయే 100 రోజుల్లో.. దళితుడిని ముఖ్యమంత్రిని చేస్తానని దోఖా ఇచ్చిన దగాకోరును గద్దె దించడం గ్యారంటీ...! మూడెకరాల భూమి మాట తప్పి, వేల ఎకరాలు వెనకేసిన భూబకాసురులను బొందపెట్టడం గ్యారంటీ...! కాపలా కుక్కలాగా ఉంటానని, ఖజానాను కొల్లగొడుతున్న దొంగల ముఠాను తరిమికొట్టడం గ్యారంటీ...!
కమీషన్లను దండుకోవడమే 'మిషన్' లాగా పెట్టుకున్న వసూల్ రాజాల భరతంపట్టడం గ్యారంటీ...! పదేండ్లలో వందేండ్ల విధ్వంసం సృష్టించిన వినాశకారులను పాతరేయడం గ్యారంటీ...! తెలంగాణ ఆత్మగౌరవాన్ని బీజేపీకి తాకట్టు పెట్టిన 'గులామీ' గ్యాంగును పాతాళానికి తొక్కడం గ్యారంటీ...! నాలుగు కోట్ల ప్రజల కళ్లుగప్పి తెలంగాణ సంపదను వాటాలేసి పంచుకుంటున్న తోడు దొంగల ముసుగులను ఊడదీసి ప్రజాక్షేత్రంలో ఉరికించడం గ్యారంటీ...! అధికారం శాశ్వతం అనుకుని నీలిగిన నిజాం రాచరికాన్నే పీచమణిచిన గడ్డ ఇది.. మీరొక లెక్కా..? అధికారంలోకి వస్తున్నాం.. అన్ని గ్యారంటీలు అమలు చేస్తున్నాం..’ అని రేవంత్ రెడ్డి ట్వీట్ చేశారు.
