KTR: రేవంత్ రెడ్డి వ్యాఖ్యలకు కేటీఆర్ కౌంటర్
దిశ, తెలంగాణ బ్యూరో/ డైనమిక్ బ్యూరో: దావోస్ (Davos) పర్యటనలో ఉన్న ముఖ్యమంత్రి రేవంత్ రెడ్డి తను ఉద్దేశించి చేసిన వ్యాఖ్యలపై బీఆర్ఎస్ వర్కింగ్ ప్రెసిడెంట్ కేటీఆర్ (KTR) రియాక్ట్ అయ్యారు. నన్ను ఒక ఐటీ ఉద్యోగి అంటూ తక్కువ చేసి మాట్లాడొచ్చని అనుకునేవాళ్ళకి ఒకటే చెప్పదలుచుకున్నాను.. ఐటీ ఉద్యోగుల (IT Sector) విద్యార్హతలకు, వారి నిబద్ధతకు కొందరు యాక్సిడెంటల్ రాజకీయ నాయకులు సరితూగరు అంటూ కౌంటర్ ఇచ్చారు. అలాంటి వాళ్ళు ప్రవేశపట్టే అనాలోచిత విధానాలకు మనం భారీ మూల్యం చెల్లించుకుంటున్నామన్నారు. గురువారం ట్విట్టర్ వేదికగా స్పందించిన ఆయన ఐటీ పరిశ్రమలలో ఉండాలంటే నిజమైన ప్రతిభ, విద్య, అంకితభావం అనేవి చాలా అవసరం. కానీ సంచుల కొద్ది డబ్బులతో ఎమ్మెల్యేలను కొనడానికి, ఢిల్లీ బాసులకి డబ్బులు పంపడానికి ఇవేమీ అవసరం లేదన్నారు. ప్రపంచవ్యాప్తంగా ఉన్న ఐటీ ఉద్యోగులు ఎంతో కష్టపడి వారి జీవనోపాధిని పొందుతున్నారు. ఐటీ, ఐటీ అనుబంధ సంస్థల్లో ఉన్న నా అక్కాచెల్లెళ్ళకు, అన్నాదమ్ముళ్ళకు సలాం.. మీ మేధస్సు, అవిశ్రాంత శ్రమే ఆధునిక సాంకేతిక ప్రపంచానికి వెన్నుముక. మీరు లేకుంటే ప్రగతి రథచక్రాలు ఆగిపోతాయని, నా విద్యార్హతలు, నా ఉద్యోగ అనుభవం, ఐటీలో నా నేపథ్యం, ముఖ్యంగా ఐటీ రంగంలో ఉన్న ఉద్యోగులు నాకు ఎప్పటికి గర్వకారణం అని పేర్కొన్నారు. దావోస్ పర్యటనలో ఓ ఇంటర్వ్యూలో మాట్లాడిన రేవంత్ రెడ్డి (Revanth Reddy) కేటీఆర్ ఐటీ ఎంప్లాయ్ కాబట్టి ఆయన ఎంప్లాయ్ మైండ్ సెట్ తో ఆలోచిస్తారు. నేను పొలిటీషియన్ ను పాలసీ మేకర్ ను అని వ్యాఖ్యానించారు.
