రోడ్డెక్కిన వ్యవసాయ కళాశాల విద్యార్థులు
దిశ, తంగళ్లపల్లి : బాబు జగ్జీవన్ రామ్ వ్యవసాయ కళాశాల విద్యార్థులు నిరసన వ్యక్తం చేశారు.లెక్కకు మించి విద్యార్థులను చేర్చుకోవడం వల్ల తమకు హాస్టల్ వసతి సరిపోవడం లేదని ఆరోపిస్తూ గురువారం రాజన్న సిరిసిల్ల జిల్లా తంగళ్లపల్లి మండలంలోని జిల్లెల్ల వద్ద ఉన్న బాబు జగ్జీవన్ రామ్ వ్యవసాయ కళాశాల విద్యార్థులు రోడ్డెక్కారు. ఈ సందర్భంగా పలువురు విద్యార్థులు మాట్లాడుతూ హాస్టల్ లో లెక్కకు మించి విద్యార్థులను చేర్చుకుంటున్నారని దీంతో తమకు హాస్టల్ లో ఉండడం ఇబ్బందిగా మారిందని, వెంటనే అధికారులు స్పందించి, తమ హాస్టల్ కష్టాలను తీర్చాలని కోరుతూ నిరసన తెలుపుతున్నామని అన్నారు.
ఇదే విషయంపై కళాశాల ప్రిన్సిపాల్ శ్రీదేవిని వివరణ కోరగా విశ్వవిద్యాలయం ఉన్నతాధికారుల ఆదేశాల మేరకే కళాశాలలో చదువుకుంటున్న విద్యార్థినిల రక్షణ కొరకై విద్యార్థులను తాత్కాలికంగా ఏర్పాటు చేసిన వసతి గదుల్లో ఉంచడం జరుగుతుందని, ఇది ప్రస్తుతానికి విద్యార్థులకు కాస్త ఇబ్బంది కలిగించినప్పటికీ, బాలికల భద్రతా చర్యల్లో భాగంగా తప్పనిసరి పరిణామమని, త్వరలోనే విద్యార్థుల కష్టాలు తీర్చేందుకు కృషి చేస్తామని అన్నారు.
