రేవంత్ రాక్షస పాలనలో హైడ్రా జులుం : దాసోజు శ్రవణ్ కుమార్

దిశ, తెలంగాణ బ్యూరో: రేవంత్‌రెడ్డి రాక్షస పాలనలో హైడ్రా జులుం విదిలిస్తున్నదని బీఆర్ఎస్ నేత దాసోజు శ్రవణ్ కుమార్ ఆరోపించారు. హైడ్రా చర్యలపై ఆయన ‘ఎక్స్’ వేదికగా స్పందించారు. తెలంగాణ అవుట్‌డోర్ మీడియా అసోసియేషన్ ఆధ్వర్యంలో బాలాపూర్ చౌరస్తా వద్ద అనుమతులు ఉన్న హోర్డింగులను హైడ్రా అధికారులు అక్రమంగా తొలగిస్తూ, వేలాది కుటుంబాల జీవనాధారాన్ని నాశనం చేస్తున్నారని ఆరోపించారు. కోర్టు ఉత్తర్వులను హైడ్రా తుంగలో తొక్కిందని తెలిపారు. శని, ఆదివారాల్లో హోర్డింగ్ తొలగింపులు చేయరాదని హైకోర్టు స్పష్టంగా ఆదేశించినా, హైడ్రా అధికారులు కోర్టు ఉత్తర్వులను ధిక్కరిస్తూ రాజ్యాంగ విరుద్ధంగా వ్యవహరిస్తున్నారని పేర్కొన్నారు. పెద్ద పెద్ద బిల్డర్స్ చెరువుల్లో ఆకాశహర్మ్యాలు కడుతుంటే తలూపని ప్రభుత్వం, పేద మధ్య తరగతి ప్రజలపై తన అధికార ప్రతాపాన్ని చూపించడం ఎంతవరకు న్యాయమని ప్రశ్నించారు. హైడ్రా అధికారులు అక్రమార్జన పాల్పడుతున్నారని వ్యాపారులు ఆరోపిస్తున్నారని తెలిపారు.

హోర్డింగ్ యజమానులు, వ్యాపారులు హైడ్రా అధికారులపై తీవ్ర ఆరోపణలు చేస్తూ, తొలగించిన హోర్డింగ్ మెటీరియల్‌ను అవి అమ్ముకుంటున్నారని సంచలన విషయాన్ని బయటపెట్టారని పేర్కొన్నారు. ఇదంతా వ్యాపారుల రక్తాన్ని పీల్చే కుట్ర కాదా? అని నిలదీశారు. వేల కుటుంబాల రోడ్డునపడే ప్రమాదం పొంచి ఉందని.. హోర్డింగ్ కార్మికులపై హైడ్రా దాడులు సరికాదని పేర్కొన్నారు. ఈ వ్యాపారం మీద లక్షలాది కుటుంబాలు ఆధారపడి జీవిస్తున్నాయని, హోర్డింగ్ కార్మికులపై హైడ్రా అధికారులు దాడులు చేశారని వ్యాపారులు తీవ్రంగా మండిపడుతున్నారని తెలిపారు. ప్రభుత్వం తాను చేస్తున్న తప్పును సరిదిద్దుకోవాలని.. ఈ అక్రమాలను తక్షణమే ఆపకుంటే, రాష్ట్రవ్యాప్త నిరసనలు, ధర్నాలు నిర్వహించేందుకు వ్యాపారులు సిద్ధమవుతున్నారని హెచ్చరించారు. సీఎం రేవంత్ రెడ్డి వెంటనే చర్యలు తీసుకుని ఈ రాక్షస పాలనకు అడ్డుకట్ట వేయాలని వ్యాపారులు విజ్ఞప్తి చేస్తున్నారని తెలిపారు. ప్రజాస్వామ్యాన్ని తుంగలో తొక్కి హైడ్రా గ్యాంగ్‌తో కలిసి రాక్షస పాలన సాగించొద్దని సీఎం రేవంత్‌ను కోరారు.