దోస్త్ స్పెషల్ ఫేజ్ అడ్మిషన్ గడువు పొడిగింపు

దిశ, తెలంగాణ బ్యూరో : దోస్త్ స్పెషల్ ఫేజ్ అడ్మిషన్ గడువును పొడిగించినట్లు కాలేజీ ఎడ్యుకేషన్ కమిషనర్ దేవసేన శనివారం ఒక ప్రకటనలో వెల్లడించారు. వాస్తవానికి స్పెషల్ షెడ్యూల్ అడ్మిషన్ల గడువు 2వ తేదీతో ముగియగా.. విద్యార్థుల సౌకర్యార్థం ఈ నెల 5 వరకు అవకాశ కల్పించినట్లు తెలిపారు. కాగా వెబ్ ఆప్షన్లకు కూడా 5వ తేదీ వరకే అవకాశం కల్పించారు. కాగా ఈ నెల 7న స్పెషల్ ఫేజ్ సీట్ అలాట్మెంట్ చేపట్టనున్నారు. సీటు పొందిన విద్యార్థులు 8, 9 తేదీల్లో ఆన్ లైన్ లో సెల్ఫ్ రిపోర్టింగ్ చేయాల్సి ఉంటుందని పేర్కొన్నారు. ఆపై ఆ తేదీల్లోనే ఆయా కాలేజీలకు విద్యార్థులు స్వయంగా వెళ్లి రిపోర్ట్ చేయాల్సి ఉంటుందని దేవసేన స్పష్టంచేశారు.