ఆ కేంద్రమంత్రి ఒక యూజ్‌లెస్ ఫెలో.. రేణుకా చౌదరి వివాదాస్పద వ్యాఖ్యలు
దిశ, డైనమిక్ బ్యూరో: ప్రధానమంత్రి నరేంద్రమోడీ, కేంద్ర న్యాయశాఖ మంత్రి కిరణ్ రిజిజులపై కాంగ్రెస్ నేత, కేంద్ర మాజీమంత్రి రేణుకా చౌదరి వివాదాస్పద వ్యాఖ్యలు చేశారు. కేంద్ర మంత్రి కిరణ్ రిజిజు యూజ్‌లెస్ ఫెలో, లుచ్చా గాడు అంటూ ఘాటు వ్యాఖ్యలు చేశారు. మరోవైపు, ప్రధాని మోడీపై సైతం సంచలన వ్యాఖ్యలు చేశారు. ‘యూ హావ్ నో హార్ట్ మిస్టర్ మోడీ’ అని ఆమె వ్యాఖ్యానించారు. తనపై మోడీ చేసిన వాఖ్యలపై లీగల్‌గా వెళ్ళే ఆలోచనలో ఉన్నానని తెలిపారు. రాహుల్ అనర్హత కేసులో న్యాయపరంగా వెళ్లడంతో పాటు పార్టీ కార్యచరణ చేపడుతోందన్నారు.
కాంగ్రెస్ యాక్షన్ ప్లాన్ ఏంటో త్వరలోనే తెలుస్తుందన్నారు. రాహుల్ గాంధీ మాట్లాడేవన్నీ వాస్తవాలేనని..రాహుల్ అడిగే వాటికి సమాధానం చెప్పాలని డిమాండ్ చేశారు. షారుఖ్ ఖాన్ ముస్లిం కాబట్టే ఆయన కొడుకుపై డ్రగ్స్ అభాండాలు వేసి అదానీ విషయాలు పక్కతోవ పెట్టించారని విమర్శించారు. అదానీ, మోడీ సంబంధాలపై రాహుల్ ప్రశ్నించగానే ఆయన్ని టార్గెట్ చేశారని పేర్కొన్నారు. అంతేకాకుండా, ప్రధాని రాహుల్ గాంధీకి భయపడుతున్నారని అన్నారు. నిజాలు బయట పడుతున్నాయని రాహుల్‌పై కుట్రలు చేస్తున్నారని మండిపడ్డారు.
