పోలీసుల పనితీరును ఆన్లైన్లో తెలియజేయాలి
దిశ, ఆదిలాబాద్ : జిల్లాలో పోలీసుల పనితీరును ఎప్పటికప్పుడు తెలియజేయడానికి రాష్ట్ర ప్రభుత్వం ప్రత్యేక క్యూ ఆర్ కోడ్ ను ప్రవేశ పెట్టిందని, దాని ద్వారా ప్రజలు తమ అభిప్రాయాలను తెలియజేయాలని జిల్లా ఎస్పీ గౌస్ ఆలం అన్నారు. సిటిజన్ ఫీడ్ బ్యాక్ ను తెలియజేయడానికి రాష్ట్ర వ్యాప్తంగా ప్రవేశ పెట్టిన సిటిజన్ ఫీడ్ బ్యాక్ క్యూఆర్ కోడ్ ను జిల్లా ఎస్పీ గురువారం ప్రారంభించారు. ఈ సందర్భంగా సమావేశ మందిరంలో జిల్లా ఎస్పీ గౌస్ ఆలం, ఉట్నూర్ ఏఎస్పీ కాజల్, స్పెషల్ బ్రాంచ్ డీఎస్పీ పోతారం శ్రీనివాస్ తో కలిసి ఆయన మాట్లాడారు.
ఇది వరకు రాష్ట్ర పోలీసుల సేవలపై ఔట్సోర్సింగ్ సిబ్బంది కాల్స్ ద్వారా సేకరించి ప్రజల నుండి అభిప్రాయాన్ని సేకరించేవారని అన్నారు. ప్రస్తుతం పిటిషన్, ఎఫ్ఐఆర్, ఈ చలాన్, పాస్పోర్ట్ ధ్రువీకరణ, ఇతర అంశాలపై పోలీసు అధికారుల ప్రతిస్పందన, ప్రవర్తన, వారి అభిప్రాయాలను నమోదు చేయవచ్చని తెలిపారు. పోలీస్ స్టేషన్లో అధికారులు సేకరించిన అభిప్రాయాల ఆధారంగా రాష్ట్ర వ్యాప్తంగా ఉన్న పోలీస్ స్టేషన్లో రేటింగ్ చేయబడతాయని స్పష్టం చేశారు. ఈ అభిప్రాయ సేకరణను సరికొత్త నూతన సాంకేతికత క్యూఆర్ కోడ్ ద్వారా నవీకరించినట్టు తెలిపారు. ఈ కార్యక్రమంలో జిల్లా పోలీసు ఉన్నతాధికారులు, ఇన్స్పెక్టర్లు, సబ్ ఇన్స్పెక్టర్లు, సిబ్బంది పాల్గొన్నారు.
