పొలంలో తమన్నా, అనుష్క.. ఫలించిన రైతు ఆలోచన
దిశ, పాలేరు: సాధారణంగా మనం కొత్తగా ఇంటిని నిర్మిస్తుంటే ఆ ఇంటికి దిష్టితగలకుండా దిష్టిబొమ్మను వేలాడదీస్తాం. అలాగే పంట పొలాల్లో కాపు వచ్చినప్పుడు మనుషుల దిష్టి తగలకుండా… పంటలను నాశనం చేసే జంతువులు రాకుండా తెల్లటి వస్త్రంతో తయారు చేసిన దిష్టిబొమ్మను పొలం ముందు భాగంలో లేదా మధ్యలోనైనా ఏర్పాటు చేస్తాం. ఇదంతా పాతకథ. అలాగే హీరోయిన్ల ఫొటోలు వాల్ పోస్టర్లుగా చూసుంటారు. థియేటర్ల దగ్గర ప్లెక్సీలుగా చూసుంటారు. ఇంకొన్ని చోట్ల కటౌట్లుగా చూసుంటారు. కానీ, దిష్టిబొమ్మలుగా చూశారా.? అయితే ఓ రైతు ఇలా ఆలోచించాడు.
రైతులు కూడా అప్‌డేట్ అయ్యారనడానికి ఇదే పెద్ద ఎగ్జాంపుల్. ఖమ్మం జిల్లా నేలకొండపల్లి మండ‌లం అప్పుల నర్సింహపురం శివారులో చంద్రయ్య అనే రైతు ప్రతి సంవత్సరం నాలుగు ఎక‌రాల్లో మిర్చి, కూరగాయలు పండిస్తున్నాడు. ప్రతిసారి పంట బాగా పండడం కోత సమయానికి ఏదో ఒక తెగుళ్లు రావడం సర్వసాధారణమైంది. దాంతో దిగుబడి తగ్గిపోవడం, ప్రతి ఏడూ ఇలాగే జరుగుతోంది. దీంతో చంద్రయ్య తీవ్రంగా నష్టపోయాడు. పంట బాగా పండుతోంది. సరిగ్గా చేతికొచ్చే సమయానికే ఎందుకిలా అవుతోందని ఆలోచించాడు. కొందరిని ఆరా తీస్తే అందుకు నరదిష్టే కారణమని చెప్పారట.
అఖండ మూవీ రివ్యూ.. బాక్స్ ఆఫీస్ బద్దలు కొట్టిన బాలయ్య
అయితే చంద్రయ్య పొలం కూడా గ్రామ శివార్లలోని రోడ్డు పక్కనే ఉంటుంది. దీంతో అటుగా వచ్చిపోయే వారి దృష్టి తన పంటపై పడుతోందని వారి దిష్టి తగిలే దిగుబడి తగ్గిపోతోందని గట్టిగా నమ్మేశాడు. అంతే వెంటనే పొలంలో దిష్టిబొమ్మ ఏర్పాటు చేయాలని నిర్ణయించుకొని, బాగా ఆలోచించిన చంద్రయ్య దిష్టిబొమ్మకు బదులు దారినపోయే వారి దృష్టి మరల్చేలా తన అభిమాన హీరోయిన్ తమన్నా, అనుష్క ప్లెక్సీలు తీసుకొచ్చి పెట్టేశాడు. దారిన వెళ్లే బాటసారుల వల్ల తన పంటలకు దిష్టి తగలకుండా తమన్నా, అనుష్క ఫొటోను చూస్తూ వెళ్లిపోతుంటారని ఇతని తెలివి. ఇలా పోస్టర్లను ఏర్పాటు చేస్తే మనుషుల దిష్టి పంట పొలాల్లో కాకుండా హీరోయిన్ల మీద పడుతుంది.. తన పంటలకు దిష్టి తగలదని ఇతని నమ్మకం.
సహజంగానే పొలంలో తమన్నా, అనుష్క ప్లెక్సీలను చూసినవారి ఫోకస్ మొత్తం పంటపై నుంచి ప్లెక్సీ వైపుకి సహజంగానే మళ్లింది. ఇప్పుడు పంట బాగా పండిందని కొద్దిరోజుల్లోనే మిర్చి, కూరగాయలు చేతికొస్తాయని చెబుతున్నారు. పొలంలో తమన్నా, అనుష్క ప్లెక్సీ పెట్టాలన్న చంద్రయ్య ఐడియాను చుట్టుపక్కల పొలాల రైతులు అభినందిస్తున్నారు. తమ పంటలకు కూడా నరదిష్టి తగలకుండా హీరోయిన్ల ఫొటోలు పెట్టాలని డిసైడ్ అయ్యారు. గతంలో ఓ రైతు తన పొలంలో సన్నీ లియోన్ ఫొటో పెట్టి అందరికీ షాకిస్తే ఇప్పుడు చంద్రయ్య తన పొలంలో తమన్నా, అనుష్క ఫొటో పెట్టి అందరినీ ఆశ్చర్యపరిచాడు. దీంతో అటుగా వెళ్లేవారు సైతం రైతు ఆలోచనకు నవ్వేసుకుంటున్నారు.
