సయ్యద్ మోడీ ఇంటర్నేషనల్ సూపర్ 300 టోర్నీ.. సెకండ్ రౌండ్‌కు సింధు, లక్ష్యసేన్
దిశ, స్పోర్ట్స్ : సయ్యద్ మోడీ ఇంటర్నేషనల్ సూపర్ 300 బ్యాడ్మింటన్ టోర్నమెంట్‌లో భారత్ టాప్ సీడ్ షట్లర్లు పీవీ సింధు, లక్ష్యసేన్‌లు వరుస సెట్లు గెలిచి సెకండ్ రౌండ్‌కు చేరుకున్నారు. అన్మోల్ కర్బ్‌పై సింధు 21-17, 21-15 తేడాతో గెలుపొందింది. మలేషియా ఆటగాడు సొహైల్ అదిల్‌పై లక్ష్యసేన్ 21-12, 21-12 తేడాతో గెలుపొందాడు. తొలి మ్యాచ్‌లో దీప్సికా సింగ్‌పై 21-13, 21-19 తేడాతో గెలిచిన ఇరా శర్మతో సింధు రెండో రౌండ్‌లో తలపడనుంది. మ్యాచ్ అనంతరం సింధు మాట్లాడారు. ‘రెండేళ్ల తర్వాత ఇక్కడ ఆడటం ఆనందంగా ఉంది. గాయం కారణంగా గతేడాది ఈ టోర్నీలో పాల్గొనలేదు. సొంత గడ్డపై ఆడటాన్ని గౌరవంగా భావిస్తున్నా’ అన్నారు. కిరణ్ జార్జ్, ఆయూష్ శెట్టి, మెరాబా లువాంగ్‌లు మెన్స్ సింగిల్స్‌ రెండో రౌండ్‌కు చేరుకున్నారు. మాల్విక బన్సోద్, అనుపమ ఉపాధ్యాయ, ఇషారాణి, దేవిక సిహగ్, ఉన్నతి హుడా, తస్నిమ్ మీర్, శ్రీయాంషిలు మహిళల సింగిల్స్‌లో నెక్ట్స్ స్టేజ్ చేరుకున్నారు.
