హర్మన్‌ప్రీత్ రనౌట్‌పై అలిస్సా హీలీ సంచలన వ్యాఖ్యలు..

దిశ, వెబ్‌డెస్క్: మహిళల టీ20 ప్రపంచకప్‌లో ఆస్ట్రేలియాతో జరిగిన సెమీఫైనల్లో టీమిండియా 5 పరుగుల తేడాతో ఓటమిపాలైన విషయం తెలిసిందే. అయితే కీలక సమయంలో హర్మన్‌ప్రీత్ కౌర్ రనౌటవ్వడం భారత విజయవకాశాలను దెబ్బతీసింది. అయితే ఈ రనౌట్ వ్యవహారం ప్రస్తుతం తీవ్ర చర్చనీయాంశమైంది. దురదృష్టవశాత్తు రనౌటయ్యానని హర్మన్ ప్రీత్ కన్నీటి పర్యంతమైతే.. స్కూల్ గర్ల్ మిస్టేక్ అంటూ కొందరు మాజీ క్రికెటర్లు విమర్శలు గుప్పించారు.

ఈ రనౌట్ చేసిన ఆస్ట్రేలియా వికెట్ కీపర్ అలిస్సా హీలీ తన అభిప్రాయాన్ని వెల్లడించింది. అది దురదృష్టం అనడం కంటే హర్మన్‌ప్రీత్ బద్దకమని చెప్పొచ్చని ఘాటుగా విమర్శించింది. హర్మన్‌ప్రీత్ రనౌట్‌ విషయంలో దురదృష్టం కంటే బద్ధకమే ఎక్కువగా కనిపిస్తోంది. ఆ రెండు మీటర్లు దాటేందుకు పూర్తిగా ఎఫర్ట్ పెట్టి ఉంటే ఫలితం మరోలా ఉండేదని అభిప్రాయపడింది.