బిగ్ పొలిటికల్ న్యూస్.. డీకే అరుణ ఫామ్ హౌస్‌లో BJP నేతల సీక్రెట్ మీటింగ్!
దిశ, వెబ్‌డెస్క్ : తెలంగాణలో పొలిటికల్ హీట్ రోజురోజుకు పెరుగుతోంది. దుబ్బాక ఉప ఎన్నికల సమయం నుంచి బీజేపీ, టీఆర్ఎస్ మధ్య మాటల యుద్ధం నడుస్తోంది. తాజాగా హుజురాబాద్ ఉప ఎన్నికల అనంతరం మాటల దూషణలు మరింత పీక్స్ స్టేజ్‌కు చేరుకున్నాయి. కొద్ది రోజులుగా వరి ధాన్యం కొనుగోళ్ల విషయంలో టీఆర్ఎస్, బీజేపీ నేతల పోటాపోటీ ధర్నాలతో రాజకీయం మరింత హీటెక్కింది. మరోవైపు హుజురాబాద్ ఎమ్మెల్యే ఈటల రాజేందర్ సైతం అధికార పార్టీ నేతలపై షాకింగ్ కామెంట్స్ చేస్తూ వార్తల్లో నిలుస్తున్నారు.
ఇదిలా ఉండగా తెలంగాణ బీజేపీలో మరో ఆసక్తికర వార్త హాట్ టాపిక్‌గా మారింది. శనివారం (రాత్రి 8 గంటలకు) బీజేపీ నేతలు.. పార్టీ ఉపాధ్యక్షురాలు డీకే అరుణ ఫామ్‌హౌస్‌లో రహస్య సమావేశం నిర్వహించనున్నట్టు తెలుస్తోంది. హైదరాబాద్ నగర శివారులో ఈ సమావేశం జరుగుతున్నట్టు విశ్వసనీయ సమాచారం. ఈ సీక్రెట్ సమావేశానికి కేంద్రమంత్రి కిషన్‌రెడ్డి, తెలంగాణ బీజేపీ చీఫ్ బండి సంజయ్, డీకే అరుణ, ఈటల రాజేందర్, రఘునందన్‌రావు, రాజాసింగ్, జితేందర్‌రెడ్డి, వివేక్, బీజేపీ పార్టీ ముఖ్య నేతలు, తదితరులు హాజరవుతున్నట్టు తెలుస్తోంది. ఈ సమావేశంలో పార్టీ బలోపేతం, అధికార పార్టీని ఎలా ఎదుర్కోవడం అనే అంశాన్ని ముఖ్యంగా చర్చించనున్నారు. పార్టీ నేతల మధ్య నెలకొన్న విభేదాలను తొలగించి అందరినీ ఒక తాటిపైకి తీసుకువచ్చి పార్టీ కేడర్‌ను మరింత ముందుకు తీసుకెళ్లేందుకు చర్చ జరుగనున్నట్టు సమాచారం.
అయితే, ఈ సీక్రెట్ సమావేశంపై కొందరు మాత్రం.. అరుణ బీజేపీ జాతీయ ఉపాధ్యక్షురాలు అయిన సందర్భంగా నేతలకు విందు ఏర్పాటు చేశారని చెబుతున్నారు. ఏది ఏమైనప్పటికీ మరికాసేపట్లో ఈ సమావేశం గురించి పూర్తి సమాచారం తెలుస్తుంది.
