రూ.70లక్షల సొత్తు రికవరీ

దిశ, క్రైమ్‌బ్యూరో: కర్ణాటక రాష్ట్రంతో పాటు తెలంగాణలోని హైదరాబాద్ నగరంలో చోరీలకు పాల్పడుతున్న దొంగను ఎస్వోటీ పోలీసులు అరెస్ట్ చేశారు. నిందితుడి నుంచి రూ.70లక్షల సొత్తును కూకట్‌పల్లి, మాదాపూర్ ఎస్వోటీ పోలీసులు స్వాధీనం చేసుకున్నారు. వివరాలు ఇలా ఉన్నాయి. కర్ణాటకకు చెందిన జస్వరాజు ప్రకాశ్ అనే వ్యక్తి దొంగతనాలకు పాల్పడుతుండగా అక్కడి పోలీసులు అరెస్ట్ చేశారు. జైలు నుంచి విడుదలైన అనంతరం హైదరాబాద్‌‌, కర్ణాటకలో తిరుగుతూ మళ్లీ దొంగతనాలకు చేయడం మొదలు పెట్టాడు. పగటిపూట రెక్కీ నిర్వహించి తాళం వేసి ఉన్నఇళ్లు టార్గెట్‌గా రాత్రి పూట చోరీలకు పాల్పడేవాడు. తమిళనాడుతో పాటు, సైబరాబాద్, రాచొకండ కమిషనరేట్ల పరిధిలో చోరీలకు పాల్పడిన జస్వరాజు ప్రకాశ్ నుంచి పోలీసులు 1,013 గ్రాముల బంగారం, 3.2కిలోల వెండి, కారు, బైక్‌ను స్వాధీనం చేసుకున్నారు. వీటి విలువ రూ.70లక్షల వరకు ఉంటుందని అంచనా వేశారు. దాదాపు 18 ఇళ్లలో చోరీలకు పాల్పడిన నిందితుడు.. వచ్చిన సొమ్ముతో జల్సాలకు పాల్పడినట్లు విచారణలో తేలింది.