రాజమౌళి-మహేశ్ బాబు మూవీలో విలన్‌గా సల్మాన్ ఖాన్?
దిశ, సినిమా: టాలీవుడ్ స్టార్ డైరెక్టర్ ఎస్ఎస్ రాజమౌళి, బాలీవుడ్ సూపర్ స్టార్ సల్మాన్ ఖాన్ మధ్య ముంబై ఫిల్మ్ సిటీలో కొన్ని గంటలపాటు చర్చ నడిచినట్లు తెలుస్తోంది. ఈ చర్చలో రాజమౌళి కొడుకు కార్తికేయ కూడా పాల్గొనగా.. ఈ ముగ్గురు కలిసున్న పిక్ ప్రస్తుతం సోషల్ మీడియాలో వైరల్ అవుతోంది. ఫొటో విషయానికొస్తే.. జక్కన్న, కార్తికేయ నవ్వుతూ కనిపించగా పక్కనే సల్లుభాయ్ కూడా ఉన్నాడు. దీంతో ఊహాగానాలకు తెరతీసిన నెటిజన్లు.. సల్మాన్, రాజమౌళి కాంబినేషన్‌లో బిగ్ ప్రాజెక్ట్ రాబోతుందంటూ చర్చ మొదలెట్టేశారు. ‘భజరంగీ భాయిజాన్‌’ సినిమాకు కథ, స్క్రీన్‌ ప్లే అందించిన విజయేంద్ర ప్రసాద్‌.. దర్శకత్వం చేసే అవకాశాన్ని కోల్పోయారని, ఇప్పుడు మరో సినిమా కోసమే వీరు కలిశారని భావిస్తున్నారు.
కొందరు నెటిజన్లయితే ఏకంగా మహేశ్ బాబుతో రాజమౌళి తీయబోయే సినిమాలో సల్మాన్ విలన్‌గా నటిస్తాడని ఎక్స్‌పెక్ట్ చేస్తుండగా.. అదేమీ కాదని ‘హిందీ ‘బిగ్‌బాస్’ షోలో RRR ప్రమోషన్‌ కోసమే ఇదంతా అని ఎవరికి తోచినట్లు వారు ఊహిస్తున్నారు. అయితే ఇప్పటివరకు సల్మాన్ కానీ, ఇటు రాజమౌళి గానీ ఈ మీటింగ్‌కు సంబంధించి ఎలాంటి సమాచారం ఇవ్వలేదు. కాగా రాజమౌళి తెరకెక్కించిన మల్టీస్టారర్ ‘ఆర్ఆర్ఆర్’ 2022 సంక్రాంతి కానుకగా విడుదల కానుంది.
tags : Rajamouli meets Salman Khan,
slug :
