ఆ ఇద్దరు ఆటగాళ్లను విడుదల చేసిన ఆర్సీబీ

దిశ, స్పోర్ట్స్: రాయల్ చాలెంజర్స్ బెంగళూరు ఫ్రాంచైజీ ఇద్దరు విదేశీ ఆటగాళ్లను విడుదల చేస్తున్నట్లు సోమవారం ప్రకటించింది. ఆర్సీబీలోని శ్రీలంక ఆటగాళ్లు వానిందు హసరంగ, దుశ్మంత చమీరలను ఎలిమినేటర్‌కు ముందే విడుదల చేస్తున్నామని.. వాళ్లు తమ జాతీయ జట్టు శ్రీలంక క్యాంపులో చేరాల్సిన అవసరం ఉన్నందున ఈ నిర్ణయం తీసుకున్నట్లు ప్రకటించింది. శ్రీలంక జట్టు టీ20 వరల్డ్ కప్ క్వాలిఫయర్స్ ఆడాల్సి ఉన్నది.

సూపర్ 12కు నేరుగా అర్హత సాధించలేక పోవడం వల్ల శ్రీలంక, బంగ్లాదేశ్ జట్లు క్వాలిఫయర్స్ తప్పక ఆడాల్సి ఉన్నది. ఒమన్ వేదికగా టీ20 వరల్డ్ కప్ క్వాలిఫయర్ మ్యాచ్‌లు ఈ నెల 17 నుంచి ప్రారంభం కానున్నాయి. ఇప్పటికే పలు జట్లు ఒమన్, ఖతర్ వేదికలుగా జాతీయ క్యాంప్స్ నిర్వహిస్తున్నాయి. శ్రీలంక జట్టులో సభ్యులైన వానిందు హసరంగ, దుశ్మంత చమీర కూడా క్యాంపులో చేరాల్సి ఉన్నందున ఆర్సీబీ ముందుగానే వీరిని విడుదల చేసింది.