ఇది పెట్రోల్ బంకా.. నీళ్ల ట్యాంకా..?
దిశ, వెబ్డెస్క్ : ఇప్పటికే పెట్రోల్ ధరలు మండిపోతున్నాయి. అలాంటిది ఆ పెట్రోల్లో నీళ్లు దర్శనమిస్తే షాక్ అవ్వాల్సిందే. ఇప్పుడు అలాంటి ఘటనే హైదరాబాద్‌లో చోటు చేసుకుంది. ఓ వ్యక్తి లింగంపల్లిలోని హెచ్పి పెట్రోల్ బంక్‌కు వెళ్లి.. తన కారులో రూ.2 వేల పెట్రోల్ కొట్టించుకున్నాడు. బంక్ దాటి కొద్ది దూరం వెళ్లగానే కారు ఆగిపోయింది. మెకానిక్ దగ్గరికి తీసుకెళ్తే పెట్రోల్ ట్యాంక్‌లో నీళ్లు కనిపించాయి. ఇది చూసిన కారు యజమాని ఖంగుతిన్నాడు. అయితే సదరు కస్టమర్ వెంటనే పెట్రోల్ బంక్‌కు వెళ్లి, ఖాళీ బాటిల్లో పెట్రోల్ కొట్టించడంతో నీళ్లు దర్శనమిచ్చాయి. అది చూసిన కస్టమర్తో పాటు పెట్రోల్ కొట్టించుకోవడానికి వచ్చిన జనాలు కూడా అక్కడి సిబ్బందిని నిలదీశారు. దీంతో తాము నీళ్లు కలుపలేదని, వర్షానికి నీళ్లు వచ్చి ఉంటాయని సమాధానమిచ్చారు. దీంతో వాగ్వాదానికి దిగిన కస్టమర్ కారుకు రిపేర్‌ చేసి ఇస్తామని హామీ ఇవ్వడంతో గొడవ సద్దుమణిగింది.
