మెట్రో లేడీస్ కోచ్ లో దర్జాగా పురుషులు..చెంపలు చెల్లుమనిపించిన పోలీసులు
దిశ, డైనమిక్ బ్యూరో: మెట్రోలో లేడిస్ కోచ్ లో దర్జాగా ప్రయాణించిన పురుషుల చెంపలను పోలీసులు వాయించి పడేశారు. ఈ ఘటన ఢిల్లీ మెట్రోలో జరిగింది. ఢిల్లీ మెట్రో ప్రయాణికులతో నిత్యం రద్దీగా కిక్కిరిసి పోయి ఉంటుందన్న విషయం తెలిసిందే. ఈ రద్దీ వల్ల చాలా మంది పురుషులు, మహిళల కోసం ప్రత్యేకంగా ఏర్పాటు చేసిన కోచ్ లలో ప్రయాణిస్తున్నారు. దీని వల్ల మహిళా ప్రయాణికులు తీవ్ర ఇబ్బందులు పడుతున్నారు. దీనిపై మెట్రో అధికారులు హెచ్చరికలు చేసినా పట్టించుకోవడం లేదు. మహిళల కోచ్ లో పురుషులు ప్రయాణించడంపై ఇప్పటికే పలు ఫిర్యాదులు వచ్చాయి.
దీంతో నిబందనలకు విరుద్దంగా మహిళల కోచ్ లో పురుషులు ప్రయాణించడంపై చర్యలు తీసుకునేందుకు ఢిల్లీ పోలీసులు రంగంలోకి దిగారు. మెట్రో ట్రైన్ వచ్చే సమయానికి లేడీస్ కోచ్ వద్ద పోలీసులు సిద్దంగా ఉన్నారు. మెట్రో ట్రైన్ డోర్ ఓపెన్ కాగానే ఒక్కొక్కరుగా మెట్రో నుంచి దిగుతున్నారు. లేడీస్ కోచ్ నుంచి దిగుతున్న పురుషులను పట్టుకున్న పోలీసులు వారి చెంపలు చెల్లుమనిపించారు. నిబందనలు పాటించకుండా లేడీస్ కోచ్ లో ప్రయాణించేవారికి తగిన గుణపాటం చెప్పారు. దీనికి సంబందించిన వీడియో సోషల్ మీడియాలో వైరల్ గా మారాయి. దీనిపై నెటిజన్లు స్పందిస్తూ.. ఇలా కొట్టడం చట్టవిరుద్దం అని, కావాలంటే ఫైన్ వేసుకోవాలి కానీ చెయ్యి చేసుకోవడం ఏంటని మండిపడుతుండగా.. మరి కొందరు పోలీసులను ప్రశంసిస్తూ.. మంచి పని చేశారు. అన్ని చోట్ల మెట్రోల్లో ఇలాగే చేస్తే బాగుంటుంది అని కామెంట్లు పెడుతున్నారు.
