Manipur: మణిపూర్‌లో ఆగని హింస.. పోలీసులు కాల్పుల్లో నిరసనకారుడు మృతి!
దిశ, నేషనల్ బ్యూరో: మణిపూర్‌ (Manipur)లోని జిరిబామ్ (Jiribalm) జిల్లాలో హింస ఆగడం లేదు. తాజాగా భద్రతా బలగాలు జరిపిన కాల్పుల్లో ఓ నిరసనకారుడు ప్రాణాలు కోల్పోగా మరొకరు తీవ్రంగా గాయపడ్డారు. అసోంలోని కాచర్ జిల్లాలో ఓ మహిళ, చిన్నారి మృతదేహం లభ్యమవడంతో ఆగ్రహం వ్యక్తం చేసిన ఆందోళన కారులు జిరిబామ్ పోలీస్ స్టేషన్ పరిధిలోని బాబుపరా ప్రాంతంలో ఇళ్లను, పలు కార్యాలయాలను ధ్వంసం చేస్తుండగా పోలీసులు వారిపైకి కాల్పులు జరిపారు. ఈ క్రమంలో ఖుండ్రక్‌పామ్ అథౌబా (20) అనే యువకుడు మరణించగా, బిషన్ అనే వ్యక్తి గాయపడ్డట్టు అధికారులు తెలిపారు. శాంతి భద్రతలను అదుపులోకి తెచ్చేందుకే పోలీసులు కాల్పులు జరిపారని, బుల్లెట్ తాకిన వ్యక్తి మృతి చెందాడని వెల్లడించారు. దీంతో ఆ ప్రాంతంలో మరింత ఉద్రిక్త పరిస్థితులు నెలకొన్నాయి. శాంతి భద్రతలు క్షీణించడంతో ప్రభుత్వం అన్ని విద్యా సంస్థలను మూసివేసింది. ఇంఫాల్ తూర్పు, పశ్చిమ ప్రాంతాల్లో కర్ఫ్యూ విధించారు. మరోవైపు రాష్ట్రంలోని పరిస్థితులపై కేంద్ర హోం మంత్రి అమిత్ షా సమీక్షించనున్నట్టు తెలుస్తోంది.
