Delhi: చైన్ స్నాచర్లపై పోలీసుల కాల్పులు.. అనంతరం అరెస్ట్
దిశ, డైనమిక్ బ్యూరో: పట్టుకునేందుకు ప్రయత్నించిన పోలీసులపై ఎదురుదాడికి దిగడంతో చైన్ స్నాచర్లపై పోలీసులు కాల్పులు జరిపారు. ఈ ఘటన ఢిల్లీలోని పంజాబ్ బాగ్ ప్రాంతంలో జరిగింది. గత కొద్ది రోజులుగా నార్త్ ఢిల్లీలోని పలు పోలీస్ స్టేషన్ల పరిధిలో ఉదయం, సాయంత్రం వేళల్లో దోపిడీలు ఎక్కువగా జరుగుతున్నాయి. ఇద్దరు వ్యక్తులు బైక్ పై వచ్చి కత్తి చూపించి దోపిడీలకు పాల్పడుతున్నారు. ఈ నేపథ్యంలోనే తిలక్ నగర్ లో కూడా ఒంటరిగా నడుచుకుంటూ వెళుతున్న ఓ మహిళ పై దాడికి పాల్పడి ఆమె మెడలోని బంగారు ఆభరణాన్ని దొంగిలించారు. ఈ ఘటన సీసీ కెమెరాలో రికార్డ్ అయ్యింది.
దాని ఆధారంగా ఇవాళ ఉదయం అలాంటి బైక్ పైనే ఇద్దరు వ్యక్తులు వెళ్లడం చూసి పోలీసులు అనుమానించి వెంబడించారు. అంతేగాక చుట్టుపక్కల పోలీస్ స్టేషన్లను కూడా అప్రమత్తం చేశారు. ఖియాలాలోని నాలా రోడ్డులో ఓ పోలీస్ అధికారి బైక్ పై నిందితులను వెంబడించి, బైక్ తో ఢీ కొట్టాడు. అనంతరం ఆ నిందితులు అధికారిపై దాడికి ప్రయత్నించారు. దీంతో ఆత్మరక్షణ కోసం ఆ పోలీస్ అధికారి నిందితుల కాళ్లపై కాల్పులు జరిపాడు. అనంతరం వారిని అరెస్ట్ చేసి, చికిత్స నిమిత్తం ఆసుపత్రికి తరలించారు. ప్రాథమిక విచారణలో నిందితుల పేర్లు వికాస్, రమేష్ అని, వీరు ఇదివరకే పలు క్రిమినల్ కేసుల్లో నిందితులుగా ఉన్నారని పోలీసులు గుర్తించారు.
