Army exercise: భారత్, శ్రీలంక సైనిక విన్యాసాలు..‘మిత్ర శక్తి’ పదో ఎడిషన్ కంప్లీట్

దిశ, నేషనల్ బ్యూరో: శ్రీలంకలోని మదురుయోయలో ఉన్న ఆర్మీ ట్రైనింగ్ స్కూల్‌లో భారత్, శ్రీలంక సైన్యాల మధ్య జరిగిన ‘మిత్ర శక్తి’ పదో ఎడిషన్ సైనిక విన్యాసాలు ముగిసినట్టు ఆర్మీ అధికారులు ఆదివారం తెలిపారు. ఈ నెల 12న ప్రారంభమైన ఈ కసరత్తులు 24వ తేదీ వరకు కొనసాగినట్టు పేర్కొన్నారు. 12 రోజుల పాటు సాగిన విన్యాసాల్లో భాగంగా ఇరు దేశాల మధ్య సైనిక సహకారాన్ని పెంపొందించడం, రెండు దళాలు సమన్వయంతో పని చేయడం లక్ష్యంగా పెట్టుకున్నాయి. రెండు దేశాల సైన్యాలు అవసరమైనప్పుడు సంయుక్తంగా కార్యకలాపాలు చేపట్టేందుకు వీలుగా ఈ శిక్షణ నిర్వహించినట్టు సీనియర్ అధికారి ఒకరు తెలిపారు.

‘ఉగ్రవాద నియంత్రణ, ప్రాంతీయ భద్రత, శాంతి పరిరక్షక కార్యకలాపాల్లో పనిచేసేటప్పుడు కసరత్తులను రూపొందించడానికి ఒకరి సిద్ధాంతాలు, వ్యూహాలు, విధానాలను అర్థం చేసుకోవడానికి ఇది ఇరుపక్షాలకు ఎంతో సహాయపడింది’ అని తెలిపారు. ఈ ఏడాది మిత్ర శక్తి ఎడిషన్‌లో ఇరు దేశాల సైన్యాల నుంచి 100 మందికి పైగా సిబ్బంది పాల్గొన్నారు. ఇండియన్ ఆర్మీ, శ్రీలంక ఆర్మీల మధ్య పరస్పర చర్యను పెంపొందించడానికి సైన్యాల మధ్య సహకారాన్ని బలోపేతం చేయడానికి ఈ విన్యాసాలు ఎంతో తోడ్పడతాయని ఇండియన్ ఆర్మీ తెలిపింది.

ఈ వ్యాయామంలో ఉమ్మడి ప్రణాళిక, కార్యకలాపాల అమలు కూడా ఉంది. ఇది రెండు సైన్యాలకు తమ అభ్యాసాలను మార్పిడి చేసుకోవడానికి, వారి కార్యాచరణ సామర్థ్యాలను బలోపేతం చేయడానికి అవకాశాన్ని అందించిందని అధికారులు తెలిపారు. కాగా, మిత్ర శక్తి వ్యాయామం అనేది భారత్, శ్రీలంక సైన్యాల మధ్య జరిగే 12 రోజుల ద్వైపాక్షిక సైనిక వ్యాయామం. ఈ వ్యాయామం ప్రతి ఏటా క్రమం తప్పకుండా చేపడతారు. ఇండో-శ్రీలంక శిఖరాగ్ర సమావేశం సందర్భంగా 2004 నవంబర్ 12 న ఈ వ్యాయామం నిర్వహించడానికి రెండు దేశాలు ఒప్పందంపై సంతకం చేశాయి. ఈ కసరత్తు సైనిక సంబంధాలను బలోపేతం చేయడం, రెండు సైన్యాల మధ్య పరస్పర చర్యను పెంపొందించడం లక్ష్యంగా పెట్టుకుంది.