హైదరాబాద్‌లో హన్సిక.. ‘మై నేమ్ ఈజ్ శృతి’ అంటున్న బ్యూటీ
దిశ, సినిమా : ‘ప్రతీ మ‌గాడి విజ‌యం వెనుక ఒక స్త్రీ ఉంటుంది. అలాగే ప్రతీ మ‌హిళ సంఘ‌ర్షణ వెనుక ఒక మ‌గాడు ఉంటాడు. తన జీవితంలో ఎదురైన సంఘర్షణను ఓ యువతి ఎలా ఎదుర్కొంది?’ అనే కాన్సెప్ట్‌తో తెరకెక్కిన చిత్రం ‘మై నేమ్ ఈజ్ శృతి’. హీరోయిన్ హన్సిక టైటిల్ రోల్ ప్లే చేస్తున్న సినిమా హైదరాబాద్‌లో లాంఛనంగా ప్రారంభమైంది.
ఈ సందర్భంగా మాట్లాడిన బ్యూటీ తెలుగు సినిమాతోనే హీరోయిన్‌గా తన కెరియర్ ప్రారంభమైందని, నటిగా టాలీవుడ్ తనకు మంచి పేరు తీసుకొచ్చిందని తెలిపింది. చాలా కాలం తర్వాత తెలుగులో మరో మంచి సినిమా చేస్తుండటం ఆనందంగా ఉందని చెప్పింది. ఈ మూవీలో ఇండిపెండెంట్ గర్ల్ శృతి అనే అమ్మాయిగా కనిపిస్తానని.. సినిమా ఆద్యంతం మలుపులతో సాగుతుందని తెలిపింది. కథ వింటున్నప్పుడు తర్వాత ఏం జరుగుతుందనే ఎగ్జైట్మెంట్ ఉందని, ఎండింగ్ ఇమాజిన్ కూడా చేయలేకపోయానని చెప్పింది. మురళీ శర్మ, రాజీవ్ కనకాల ప్రధానపాత్రల్లో నటిస్తున్న చిత్రానికి శ్రీనివాస్ ఓంకార్ దర్శకులు కాగా రమ్య బురుగు, నాగేంద్ర రాజు నిర్మాతలు.
