మీ గురించి చెప్పేందుకు మాటల్లేవు.. రాజమౌళిపై రేణూ దేశాయ్ కామెంట్స్

దిశ, వెబ్‌డెస్క్: ‘బాహుబలి’ రిలీజై దాదాపు 8 ఏళ్లు పూర్తి కావోస్తుంది. రాజమౌళి దర్శకత్వంలో వచ్చిన సినిమా అప్పట్లో బాక్సాఫీస్ హిట్‌గా నిలిచి.. రికార్డుల సునామీ సృష్టించింది. అయితే.. ఈ మూవీ రిలీజై సంవత్సరాలు గడుస్తున్నా ఏదో ఒక రకంగా వార్తల్లో నిలుస్తూనే ఉంది. తాజాగా మరో అరుదైన గౌరవం దక్కించుకుంది. ఈ క్రమంలోనే నార్వే దేశంలో స్టావెంజన్ థియేటర్లలో బాహుబలి ప్రదర్శించారు. ఈ ప్రీమియర్ షోకి రాజమౌళి, రమా రాజమౌళి, నిర్మాత శోభు యార్లగడ్డ, దర్శకుడు రాఘవేంద్రరావు హాజరయ్యారు. అంతేకాకుండా ఈ ఈవెంట్‌కు రేణూ దేశాయ్, అకీరా నందన్‌కి సైతం ఆహ్వానం అందించారట బాహుబలి టీమ్.

దీంతో దర్శకుడు రాజమౌళి, నిర్మాత శోభు యార్లగడ్డకు సోషల్ మీడియా వేదికగా ధన్యవాదాలు తెలుపుకుంది రేణూ. ఈ మేరకు.. ‘‘ఒక భారతీయ చలనచిత్రం అంతర్జాతీయంగా గుర్తింపు పొందడం చాలా అద్భుతమైన, లోతైన అనుభవం. రాజమౌళి, మీరు మా ప్రేక్షకుల కోసం సృష్టించిన వీక్షణ అనుభూతిని వర్ణించడానికి పదాలు లేవు. స్టావంజర్‌లో ఈ వాస్తవిక అనుభవం కోసం అకీరా, నన్ను ఆహ్వానించినందుకు థ్యాంక్యూ అనేది చాలా చిన్న పదం’’ అంటూ ఓ పోస్ట్ షేర్ చేసింది.