కడంబా ఎన్కౌంటర్ మృతుల గుర్తింపు..!
దిశప్రతినిధి, ఆదిలాబాద్: కొమురం భీం ఆసిఫాబాద్ జిల్లా కాగజ్నగర్ పోలీస్ డివిజన్లోని కడంబా ఫారెస్ట్లో జరిగిన ఎన్కౌంటర్లో మరణించిన మావోయిస్టుల మృతదేహాలను గుర్తించారు. ఈ మేరకు ఆదివారం మధ్యాహ్నం రామగుండం పోలీస్ కమిషనర్ సత్యనారాయణ ఆధ్వర్యంలో ఎన్కౌంటర్ మృతుల గుర్తింపు కార్యక్రమాన్ని చేపట్టారు.
ఎన్కౌంటర్లో మృతి చెందిన వారిలో చత్తీస్ఘడ్ రాష్ట్రంలోని బీజాపూర్ జిల్లా పామిడికి చెందిన చొక్కాలు, అదిలాబాద్ జిల్లా నేరడిగొండ మండలం యాపల్గూడకు చెందిన జుగ్నాక బాదీరావ్లుగా గుర్తించారు. అయితే ముందుగా ఎన్కౌంటర్లో మావోయిస్టు పార్టీ రాష్ట్ర కార్యవర్గ సభ్యుడు భాస్కర్ భార్య కంతి లింగవ్వ, మరో మావోయిస్టు వర్గీస్ ప్రభాత్లు మృతి చెందినట్టు ప్రచారం జరిగింది. కానీ తాజాగా పోలీసులు వెల్లడించిన ప్రకారం మృతులు ఇద్దరూ వేరే వాళ్ళు కావడం గమనార్హం. ఉమ్మడి జిల్లా అగ్రనేత భాస్కర్ సహా మిగతా వాళ్లు తప్పించుకున్నట్లు తెలుస్తోంది. ఘటనాస్థలిలో ఒక 9 ఎంఎం పిస్టల్, 12 బోర్ తుపాకీ లభ్యమయ్యాయి. విప్లవ సాహిత్యంతో పాటు కొన్ని లేఖలు, దుస్తులను పోలీసులు స్వాధీనం చేసుకున్నట్లు పోలీసులు వెల్లడించారు.
