గచ్చిబౌలిలో ఘోర రోడ్డు ప్రమాదం.. ఐదుగురు మృతి

దిశ, వెబ్‌డెస్క్ : హైదరాబాద్ మహానగరంలో ఘోర రోడ్డు ప్రమాదం సంభవించింది. ఈ ఘటనలో ఐదుగురు స్పాట్‌లోనే మృత్యువాత పడ్డారు. ఆదివారం ఉదయం 2.30 గంటల ప్రాంతంలో గచ్చిబౌలి నుంచి విప్రోసర్కిల్ వైపు వెళ్తున్న సుజుకీ స్విఫ్ట్ కారు సిగ్నల్ జంప్ చేసి అతివేగంగా ప్రయాణించింది. అదే సమయంలో కోకాపేట నుంచి విప్రో సర్కిల్ వైపు టర్న్ తీసుకున్న టిప్పర్ లారీ వేగంగా వచ్చి ఢీకొట్టడంతో కారు నుజ్జునుజ్జు అయింది.

ఈ రోడ్డు ప్రమాదంలో టిప్పర్ కూడా బోల్తా కొట్టింది. సమాచారం అందుకున్న పోలీసులు వెంటనే ఘటనా స్థలికి చేరుకుని కారులో నుంచి మృతదేహాలను వెలికితీశారు.మృతుల్లో కాట్రగడ్డ సంతోష్ (25), చింతా మనోహర్ (22), పప్పు భరద్వాజ్ (20), రోషన్ (21), పవన్ (23)లుగా గుర్తించారు. సిగ్నల్ జంప్, అతివేగమే ప్రమాదానికి కారణమని పోలీసులు చెబుతున్నారు. ఈ మేరకు కేసు నమోదు చేసుకుని దర్యాప్తు చేస్తున్నట్లు గచ్చిబౌలి పోలీసులు తెలిపారు.