తాండూరు టికెట్ 'పైలట్ కే'.. మాజీ ఎమ్మెల్యే ఆసక్తికర వ్యాఖ్యలు

దిశ, తాండూరు: రాబోయే ఎన్నికల్లో అధికార టీఆర్ఎస్ పార్టీలో టీఆర్ఎస్ తరుపున తాండూరు ఎమ్మెల్యే టికెట్ ఎవరికి వస్తుందో మాజీ ఎమ్మెల్యే నారాయణ రావు స్పష్టం చేశారు. మంగళవారం బషీరాబాద్ మండలంలో జరిగిన ఓ సమావేశంలో ఎమ్మెల్యే పైలట్ రోహిత్ రెడ్డి, మాజీ ఎమ్మెల్యే నారాయణ రావు కలిసి హాజరయ్యారు. ఈ సమావేశంలో మాజీ ఎమ్మెల్యే నారాయణ రావు మాట్లాడుతూ… రాబోయే సార్వత్రిక ఎన్నికల్లో సైతం ఎమ్మెల్యే పైలట్ రోహిత్ రెడ్డికే పార్టీ టికెట్ వస్తుందని జోస్యం చెప్పారు. అయితే ఇప్పటి నుంచి రానున్న రెండున్నర ఏళ్లు కష్టపడితే ఎమ్మెల్యే రోహిత్ రెడ్డికి భారీ మెజారిటీ వస్తుందని ఆశాభావం వ్యక్తం చేశారు. ఇదిలావుండగా ఎమ్మెల్యే రోహిత్ రెడ్డి, ఎమ్మెల్సీ మహేందర్ రెడ్డి మధ్య పచ్చగడ్డి వేస్తే భగ్గుమనేలా ఉన్న నేపథ్యంలో మాజీ ఎమ్మెల్యే నారాయణ రావు ఇలాంటి వ్యాఖ్యలు చేయడం సంచలనంగా మారింది. అయితే తాండూరు నియోజకవర్గంలో గత కొంతకాలంగా శాసిస్తున్న ప్రస్తుత ఎమ్మెల్సీ మహేందర్ రెడ్డి అదే పార్టీలో ఉండగానే.. మాజీ ఎమ్మెల్యే ఇలాంటి వ్యాఖ్యలు చేయడం వల్ల చర్చకు దారితీసింది. ఏదేమైనప్పటికీ మాజీ ఎమ్మెల్యే చేసిన వ్యాఖ్యలు తాండూరు రాజకీయ వర్గాల్లో ప్రకంపనలు సృష్టిస్తున్నాయి. మాజీ ఎమ్మెల్యే చేసిన వ్యాఖ్యల పట్ల ఓ వర్గం నేతలు గుర్రుగా ఉన్నట్లు సమాచారం.